နှလုံးတစ်ခုထက်ပိုပါသော တိရစ္ဆာန်များအကြောင်း

နှလုံးတစ်ခုထက်ပိုပါသော တိရစ္ဆာန်များအကြောင်း

ကမ္ဘာပေါ်မှာရှိတဲ့ သတ္တဝါတိုင်းမှာ နှလုံးတစ်ခုပဲ ပါဝင်ကြတာ မဟုတ်ပါဘူး။ နှလုံးတစ်ခုထက်ပိုပါတဲ့ တိရိစ္ဆာန်အကောင်လေးတွေကိုတော့ အောက်မှာ ဖော်ပြထားပါတယ်။

Octopus (ရေဘဝဲ)

Octopusလေးတွေမှာ နှလုံး၃ခု ရှိပါတယ်။ Octopus မျိုးစိတ်ပေါင်း ရာကျော်ရှိပြီး မျိုးစိတ်အကုန်လုံးမှာ နှလုံး သုံးခုပါကြပါတယ်။ နှလုံး တစ်ခုက သွေးလည်ပတ်မှုစနစ်တစ်ခုလုံးအတွက် သွေးတွေကို ညှစ်ထုတ်ပေးပြီး ကျန်တဲ့နှစ်ခုကတော့ ပါးဟက်သို့ဖြတ်မယ့် သွေးတွေကို ညှစ်ထုတ်ပေးပါတယ်။

Squid (ကင်းမွန်)

Squidတွေမှာလည်း Octopusတွေလို အရွယ်အစားကွာခြားမှုအလိုက် မျိုးစိတ်ပေါင်း ရာကျော်ရှိပြီး နှလုံး သုံးခု ရှိကြပါတယ်။ ထို့ပြင် နှလုံးရဲ့ လုပ်ဆောင်မှုတွေဟာလည်း Octopusနဲ့ ဆင်တူပါပဲ။ နှလုံးသုံးခုမှာ တစ်ခုဟာ ခန္ဓာကိုယ်အနှံ့သို့ သွေးတွေ ညှစ်ထုတ်ပေးပြီး ကျန်တဲ့ နှစ်ခုကတော့ ပါးဟက်သို့ သွေးတွေ ညှစ်ထုတ်ပေးပါတယ်။

Earthworm

Earthwormအများစုကတော့ သေးသေးလေးတွေ ဖြစ်ပေမယ့် ၁၀ပေလောက်ထိ ရှည်တဲ့ Giant Earthwormလို့ခေါ်သော မျိုးစိတ်တွေလည်း ရှိပါတယ်။ Earthwormတွေမှာတော့ နှလုံး ငါးခု ပါရှိကြပါတယ်။

Hagfish

Hagfishတွေဟာ အချွဲရည်တွေ အများကြီး ထုတ်နိုင်တဲ့ စွမ်းရည်ကြောင့် လူသိများကြပါတယ်။ Hagfishတွေမှာတော့ နှလုံးလေးခု ပါဝင်ကြပါတယ်။ တစ်ခုက သွေးလည်ပတ်မှုကို အဓိကလုပ်ဆောင်တဲ့ အင်္ဂါအစိတ်အပိုင်းဖြစ်ပြီး ကျန်တဲ့ သုံးခုကတော့ သွေးတွေကို ညှစ်ထုတ်ပေးနိုင်စွမ်းကို အားဖြည့်ပေးကြပါတယ်။ Hagfishလေးတွေဟာ အောက်ဆီဂျင်နည်းတဲ့ ရေမှာ နေထိုင်ကြတာဖြစ်ပြီး သူတို့ရဲ့ နှလုံးတွေဟာ အောက်ဆီဂျင်မပါဘဲ ၃၆နာရီကြာတဲ့အထိ သွေးလည်ပတ်နိုင်စွမ်း ရှိကြပါတယ်။

Cuttlefish

Cuttlefishတွေမှာလည်း Squidတို့ Octopus တို့လို နှလုံး သုံးခုပါဝင်ပြီး တစ်ခုက ခန္ဓာကိုယ်အနှံ့ သွေးညှစ်ထုတ်ပေး၍ နောက်နှစ်ခုကတော့ ပါးဟက်သို့ ဖြတ်မယ့် သွေးတွေကို ညှစ်ထုတ်ပေးပါတယ်။

Cockroaches (ပိုးဟပ်)

Cockroachesတွေဟာ ဒဏ်ရာအပြင်းအထန်ရနေရင်တောင် အသက်ရှင်နိုင်စွမ်းရှိကြတာကို မြင်ဖူးကြမှာပါ။ ဒီလို အသက်ရှင်နိုင်စွမ်းရှိကြတယ်ဆိုတာကလည်း သူတို့မှာ နှလုံး ၁၃ခုပါဝင်တာက အကြောင်းရင်းတစ်ခုအနေနဲ့ ရှိပါတယ်။ ပညာရှင်အချို့ကတော့ နှလုံးက တစ်ခုတည်းဖြစ်ပြီး ထိုနှလုံးမှာ အကန့် ၁၃ခုပါဝင်တာလို့လည်း ဆိုကြပါတယ်။ ထိုအကန့် ၁၃ခုဟာ အတန်းလိုက် စီထားသလို ဖြစ်ပြီး တစ်ကန့်မှ တစ်ကန့်သို့ သွေးတွေ ညှစ်ထုတ်ပေးပါတယ်။ ထိုသို့ အတန်းလိုက် ဖြစ်နေတဲ့ နှလုံးများကြောင့် ပိုးဟပ်တွေမှာ သွေးလည်ပတ်မှု ရပ်တန့်သွားဖို့ဆိုတာ ခဲယဥ်းပါတယ်။