တောရိုင်းတိရိစ္ဆာန်တွေကို ဖမ်းပြီးမွေးထားသင့်လား

 

တောရိုင်းတိရိစ္ဆာန်တွေကို ဖမ်းပြီးမွေးထားသင့်လား

 

လုံးဝမမွေးသင့်ပါဘူး။ ဘာဖြစ်လို့လဲဆိုတာစပြောရရင် မွေးကတည်းကသဘာဝထဲမှာကြီးလာနေလာပျော်လာတာဖြစ်လို့ သူတို့အတွက်အသက်ရှင်နေထိုင်ဖို့အကောင်းဆုံးနေရာက သဘာဝကြီးပါ။ လူတွေအနေနဲ့မွေးမြူမယ်ဆိုရင် လိုအပ်တဲ့ပတ်ဝန်းကျင်တခုဖန်တီးပေးနိုင်မှပဲရပါတယ်။ သူတို့အတွက်လိုအပ်တဲ့ပတ်ဝန်းကျင်တခုဖန်တီးပေးဖို့ဆိုတာကလည်း လုံးဝမလွယ်ကူပါဘူး။

 

နောက်တချက်က တရားလုံးဝမဝင်ပါဘူး။ အခုတွေ့နေရတဲ့ wildlife trading တွေကလုံးဝတရားမဝင်ပါဘူး။ ‌ အခုလိုတောရိုင်းတိရိစ္ဆာန်ရောင်းဝယ်ရေးတွေကြောင့် တိရိစ္ဆာန်မျိုးပေါင်းများစွာဟာ မျိုးသုဉ်းတော့မယ့်အန္တရာယ်နဲ့ကြုံတွေ့နေရပါတယ်။ မျိုးသုဉ်းတော့မယ့်တိရိစ္ဆာန်တွေ နှစ်စဉ်ရက်စက်စွာအမဲလိုက်ခံနေရတဲ့မျိုးတွေကို captive breeding လို့ခေါ်တဲ့နည်းနဲ့လူတွေကမွေးမြူပြီးမျိုးပြန်ပွားအောင်လုပ်ပေးတာမျိုးလည်းရှိပါသေးတယ်။ မျိုးသုဉ်းတော့မယ့်အန္တရာယ်နဲ့ရင်ဆိုင်နေရတဲ့တိရိစ္ဆာန်တွေကို ဒီနည်းနဲ့ပြန်ပြီးမျိုးပွားလေ့ရှိကြပါတယ်ဗျ။ ဒီနည်းနဲ့ပြန်ပြီးမျိုးပွားခဲ့လို့ အန္တရာယ်ကလွတ်ခဲ့တဲ့တိရိစ္ဆာန်တွေလည်းရှိခဲ့ပါတယ်။

 

ဖြစ်သလိုမွေး ကျွေးချင်သလိုကျွေးပြီး လှောင်အိမ်ထဲဖမ်းထည့်ထားတာမျိုးက သူတို့ကိုစာနာသနားလို့ကယ်ထားတာထက် ကိုယ်ကိုယ်တိုင်ကသတ်နေတာမျိုးဖြစ်တတ်ပါတယ်။ တောရိုင်းတိရိစ္ဆာန်ဆိုတာလည်း သတ္တဝါဖြစ်လို့ စိတ်ခံစားချက်ရှိပါတယ်။  ချစ်တယ်ဆိုပြီးဖမ်းထား ထားချင်သလိုထားတာမျိုးက သူတို့ကိုနေ့စဉ်နှိပ်စက်သလိုဖြစ်နေမှာပါ။

 

ဒီနေရာမှာထပ်တွေးမိမှာက သူတို့ကိုသေချာကျွေးမွေးပြီးကောင်းကောင်းမွန်မွန်ထားရင်ရော မွေးလို့ရနိုင်လား။ ကိုယ်မွေးမယ့် တောရိုင်းတိရိစ္ဆာန်တကောင်ရဲ့လိုအပ်ချက်တွေကိုသေချာလုပ်ပေးနိုင်ရင်ရပါတယ်။ ဒီစကားကအပြောနဲ့လွယ်သ‌လောက် တကယ့်လုပ်မယ်ဆိုတော့ကြ အရမ်းခက်ခဲပါတယ်။ ဘာဖြစ်လို့လဲဆိုတော့ အပေါ်ကပြောခဲ့သလိုတိရိစ္ဆာန်တ‌ကောင်လိုအပ်တဲ့အပူချိန်ကအစ တိကျသေချာတဲ့ပတ်ဝန်းကျင်တခုဖန်တီးပေးဖို့ဆိုတာလုံးဝမလွယ်ကူလို့ပါပဲဗျ။ ဖန်တီးပေးနိုင်ဖို့ကာ ကုန်ကျစရိတ်လည်းအရမ်းများမှာပါ။ ကျွမ်းကျင်တဲ့ပညာရှင်ဆီက အကြံပေးချက်တွေလည်းလိုပါဦးမယ်။ ဒါမှ ဘာလိုအပ်တယ်၊ ဘယ်လိုကျွေးရမယ်၊ ဘယ်လိုဖန်တီးပေးပြီးဘယ်လိုထားရမယ်ဆိုတာတွေကိုသိမှာပါ။ အကောင်းဆုံးကတော့ သဘာဝထဲမှာပျော်တဲ့တိရိစ္ဆာန်တွေကို သဘာဝထဲမှာထားတာအကောင်းဆုံးပါပဲခင်ဗျာ။