မော့ဆက် (အပိုင်း 4)

 ဗွေနိုးဇာရီမြို့ အိုလီဗိုရပ်ကွက်၊ ချာတာဗူကိုလမ်း၊ အိမ်အမှတ်(၄၂၆၁)

၁၉၅၈ ခုနှစ်ဦးလောက်တွင် သူလျှိုတစ်ဦးကိုလွှတ်ပြီး ထိုအိမ်ကိုစောင့်ကြည့်ခိုင်းထားသည်။ သို့သော်အခြေအနေ သိပ်မဟန်ခဲ့ပါ။ ပါးနပ်သော အိုက်ခမန်းသည် သူ့ကိုရှဲဒိုးလုပ်နေကြသည်ကိုသိရှိလာသည်။ မည်သို့ပင်ဖြစ်စေ အိုက်ခမန်းတို့မိသားစု ထိုအိမ်လိပ်စာတွင်မရှိတော့ပါ။ အိုက်ခမန်းကိုတွေ့ရှိရန်လမ်းစပျောက်သွားပြန်သည်။

ထိုနှစ်မတ်လတွင် အီဆာသည် ဗွေနိုးဇာရီမြို့သို့ အတွေ့အကြုံ ရင့်သန်သော အယ်ရုံအမည်ရှိအရာရှိတစ်ဦးကိုစေလွှတ်လိုက်သည်။ သူကိုယ်တိုင်စိတ်ကြိုက်ရွေးချယ်ပြီးသူဖြစ်သည်။

အယ်ရုံသည် အမှန်စင်စစ် မော့ဆက်အဖွဲ့ဝင်မဟုတ်၊ ရဲအရှိတစ်ဦး ဖြစ်သည်။ ပိုလန်တွင်မွေးဖွားပြီးဂျာမဏီတွင်ကြီးပြင်းသူဖြစ်သည်။ သူသည်ဗြိတိသျှ ရဲတပ်ဖွဲ့တွင်အမှုထမ်းခဲ့ပြီးလွတ်လပ်ရေးရပြီးနောက် အစ္စရေးရဲတပ်ဖွဲ့အရာရှိတစ်ဦး ဖြစ်လာသည်။ အီဆာသည်အယ်ရုံကိုရွေးရခြင်းမှာ အယ်ရုံ၏ အမှုထမ်းကောင်းမှတ်တမ်းကြောင့်ဖြစ်သည်။ ထို့ပြင်သူသည်ဂျာမန်တစ်ယောက်အနေနှင့်လွယ်ကူစွာ လှုပ်ရှားနိုင်ပေသည်။ အယ်ရုံ၏ မိသားစုအားလုံးလိုလိုသည်နာဇီအကျဉ်းစခန်းများတွင်သေဆုံးခဲ့ကြသည်။

ဗွေနိုးဇာရီမြို့သို့ခြေချပြီးသည်နှင့် အယ်ရုံသည် မျက်စိမမြင်သော ရှေ့နေကြီး လိုသာဟာမန်းကိုသွားတွေ့သည်။ ရှေ့နေကြီး၏သမီးသည် အိုက်ခမန်း၏သားဆိုသူနှင့် တွဲခုတ်နေသူဖြစ်သည်။ ထိုလူငယ်က ဂျာမဏီနိုင်ငံ၏ စစ်ရေးစစ်ရာတွင် သူ့ဖခင် မည်မျှအရေးကြီးသောနေရာ၌ ပါဝင်နေကြောင်း ကြွားလုံးထုတ်ခဲ့ရာ ရှေ့နေကြီးအား သံသယဖြစ်စေခဲ့သည်ဟုဆိုသည်။

အိုက်ခမန်းဟု သူတို့ထင်မှတ်နေသော လူအကြောင်း စုံစမ်းထောက်လှမ်းမှုများကို နူးညံ့သိမ်မွေ့စွာ ခပ်ဖြည်းဖြည်း ဆောင်ရွက်နေကြလေသည်။ ထောက်လှမ်းသူများ သတိအထားဆုံးအချက်မှာသူတို့လိုက်နေသောလူ၏ ဇစ်မြစ်အမှန်ကို အမှန်အတိုင်း ဖော်ထုတ်ရန်ဖြစ်သည်။

ပိုဆိုးနိုင်သည့်အချက်မှာ အိုက်ခမန်းအစစ်ကိုလွတ်သွားရသည်ထက် လူမှား၍ ဖမ်းမိခြင်းပင်ဖြစ်သည်။

ရှဲဒိုးလုပ်နေသူများထံမှ အိုက်ခမန်း၏ဇစ်မြစ်ကိုဖော်ထုတ်ရာ၌ ချိန်ထိုးရန် အချက်အလက် စုံလင်စွာရှိကြသည်။ သူ၏ ကိုယ်လုံးကိုယ်ထည်အနေအထား၊ သူ၏ သေးငယ်စူးဝါးသော အသံ၊ သူ၏လက်ထပ်ပွဲနှစ်ပတ်လည်ရက်စွဲ။

အိုက်ခမန်းသည် သူလက်လှမ်းမီသမျှသော သူ၏ ဓာတ်ပုံများကို ဂရုတစိုက်ဖျောက်ဖျက်ခဲ့သည်။ထို့ကြောင့် သူ့နောက်လိုက်နေသူများအဖို့ စစ်မဖြစ်ခင်က သူရိုက်ခဲ့သော ဓာတ်ပုံမှုန်ဝါးဝါးသာရယူနိုင်ခဲ့သည်။

သတင်းအစအနတွေပျောက်သွားပြန်သည်။

မော့ဆက်အတွက်ခေါင်းရှုပ်ရသည့်အချက်တစ်ခုပေါ်လာပြန်သည်။ အိုက်ခမန်းသည် ကူဝိတ်နိုင်ငံတွင်ရေနံသူဌေးကြီးတစ်ဦး ဖြစ်နေပြီဟူသော သတင်းများကြောင့် အခြေအနေပိုရှုပ်လာလေရာ မော့ဆက်အဖွဲ့ခေါင်းခဲရလေသည်။

မော့ဆက်အဖွဲ့ထဲရှိ ကြီးကြီးပိုင်းများက ဤကိစ္စကြောင့် မော့ဆက်၏ ဘတ်ဂျက်ငွေများ ကုန်လှပြီဟုဆိုကြသည်။ ဘတ်ဂျက်ငွေနည်းလှသော မော့ဆက်အဖို့ အိုက်ခမန်းဖမ်းမိရေးကိုလည်း ကြိုးပမ်းရ၊ဆီးရီးယား အီဂျစ်နှင့်အခြားအာရပ်နိုင်ငံများရှိ စစ်ရေး နိုင်ငံရေးသတင်းများကိုလည်း ထောက်လှမ်းနေရပေသည်။

အိုက်ခမန်း ရှာပုံတော်ကို ဆက်လက်လုပ်ခဲ့ကြပါသည်။ အီိဆာသည် ဤကိစ္စကိုအပြီးအထိဆောင်ရွက်ရန် ဆုံးဖြတ်ပြီးဖြစ်သည်။

၁၉၅၉ ခုနှစ် ဒီဇင်ဘာလတွင် မော့ဆက်အဖွဲ့ဝင်အချို့က အိုက်ခမန်းသည်ရီကာဒိုကလင်းမင့်အမည်ဖြင့်နေထိုင်ကြောင်း တွေ့ရှိကြသည်။ သူသည် ပင်စင်လုပ်ငန်းတစ်ခုလုပ်ကိုင်နေပြီး ထိုလုပ်ငန်းသည်ရှုံးသွားကြောင်း သိရလေသည်။

သူ၏သားကို နောက်ယောက်ခံလိုက်လာသောအဖွဲ့သည် အိုက်ခမန်းတို့မိသားစုနေထိုင်သောအိမ်ကိုတွေ့ရှိသွားလေသည်။ ဗွေနိုးဇာရီမြို့တော်၏ မြေနိမ့်ရပ်ကွက်ဖြစ်သော ဆန်ဖာနန်ဒို၏ ဂယ်ရီဘော်ဒီလမ်းတွင်ရှိသော သူတို့၏အိမ်။

မော့ဆက်အဖွဲ့ဝင်တို့သည် အိမ်ကိုအမြဲမပြတ်ကြည့်ရှုထောက်လှမ်းနေသည်။ ထောင့်အမျိုးမျိုးမှနေ၍အဝေးရိုက်မှန်ဘီလူးများကိုအသုံးပြုကာ ဓာတ်ပုံရိုက်ထားကြသည်။ အိမ်၌ ဝန်းခြံမရှိ၊ တံခါးမှာဖိုင်ဘာပြားတံခါး၊ အင်္ဂတေမကိုင်ထားသော အိမ်နံရံများ စသည့်အချက်အလက်များစုံစုံလင်လင်ရေးမှတ်ထားကြသည်။

သူတို့သည် ထိုအိမ်တွင်မိသားစုနှင့်နေထိုင်ကြပြီး ထိပ်ပြောင်စ ပြုနေပြီဖြစ်သည့်မျက်မှန်နှင့်လူတစ်ယောက် သွားလာလှုပ်ရှားပုံအမူအကျင့်တို့ကို လေ့လာမှတ်သားထားကြသည်။ ထိုလူသည်အိုက်ခမန်းဖြစ်ကြောင်း သူတို့ယုံကြည်ထားလေသည်။ ယခုသူတို့လုပ်ရမည့်တာဝန်မှာ အိုက်ခမန်းအမှန်တကယ်ဟုတ်/မဟုတ် သက်သေသာဓကပင်ဖြစ်သည်။

၁၉၆ဝ ခုနှစ်၊ မတ်လ ၂၁ ရက်နေ့။

သက်သေသာဓကများ ရရှိပါပြီ။

ထိုနေ့မှောင်ရီပျိုးစအချိန်တွင် ရီကာဒိုကလင်းမင့်သည် တံခါးဖွင့်၍ ကြိုဆိုလာသော မိန်းမတစ်ဦးကိုပန်းစည်းလက်ဆောင်ပေးလိုက်သည်။

နောက်မကြာမီ တရုတ်ကတ်ပြတင်းပေါက်များမှတဆင့် ရယ်သံများ ထွက်ပေါ်လာသည်။ အထိမ်းအမှတ်ပါတီလေးတစ်ခု ကျင်းပနေခြင်း ဖြစ်သည်။

မည်သို့သော ပါတီပွဲလေး ဖြစ်ပါသနည်း။

မော့ဆက်အဖွဲ့ဝင်တစ်ဦးသည် သူ၏စာရွက်စာတမ်းများကိုပြန်ကြည့်သောအခါ မတ်လ(၂၁)ရက်နေ့သည် အိုက်ခမန်းတို့ဇနီးမောင်နှံအိမ်ထောင်သက်(၂၅)နှစ်ပြည့်မြောက်သော ငွေရတုသဘင်အခါတော်နေ့ပင်တည်း။

ရီကာဒိုကလင်းမင့်၏ ဇာတိရုပ်အမှန်ကို သံသယဖြစ်စရာမရှိတော့ပါ။ သူသည် အဒေါ့ဖ်အိုက်ခမန်းဖြစ်ပါသည်။ အိုက်ခမန်းရှာပုံတော်သည် အဆင်ပြေပြေ ဖြစ်နေပြီး အတိမ်းအစောင်းမရှိလှ။

အိုက်ခမန်း၏ ဇာတိရုပ်အမှန်ကို မော့ဆက်အဖွဲ့ဝင်များ ဖော်ထုတ်ပြီး မကြာမြင့်မီကာလတွင် အီဆာသည်အာဂျင်တီးနားသို့သွား၍ အိုက်ခမန်းဖမ်းဆီးရေးကို ကိုယ်တိုင်ကြီးကြပ်ညွှန်ကြားရန်ဆုံးဖြတ်ချက်ချခဲ့သည်။ ထိုကိစ္စနှင့်ပတ်သက်၍ အီဆာက အောက်ပါအတိုင်း ပြောကြားခဲ့သည်။

" ဒီတာဝန်ကြီးဟာ မော့ဆက်အဖွဲ့ကြီးတွေ့ကြုံရတဲ့လုပ်ငန်းတွေထဲမှာ အခက်ခဲဆုံးနှင့် အသိမ်မွေ့ဆုံးပါပဲ။ ဒီတော့ ဒီနေရာသွားပြီး ကျုပ်ကိုယ်တိုင်ပဲ တာဝန်ယူဆောင်ရွက်သင့်တယ်လို့ ကျုပ်ထင်မိတယ်လေ"

" အီဆာဟာ အဲဒီကိုမသွားဘဲမနေနိုင်ဘူး၊ ဒါကြောင့်သွားခဲ့တာပါပဲ" ဟု သူ၏လက်ထောက်တစ်ယောက်က ဆိုလေသည်။

ပြင်ဆင်မှုများကို လျင်မြန်စွာ စတင်လုပ်ကိုင်ကြလေပြီ။ အီဆာနှင့်သူ၏လက်ထောက်များသည်အိုက်ခမန်းကိုဖမ်း၍ အာဂျင်တီးနားနိုင်ငံအပြင်သို့ စာရွက်စာတမ်းလိမ်များသုံးပြီး ခိုးထုတ်ရန် ကြံစည်ကြလေသည်။

ထိုလုပ်ငန်းကြီးအတွက် အသေးစိတ်ပြင်ဆင်ထားကြပြီး အရေးပေါ်ကိစ္စရပ်များအတွက်ကြိုတင်တွေးဆ၍ လိုအပ်သော ပြင်ဆင်မှုများ ပြုလုပ်ထားကြသည်။

အိုက်ခမန်း၏ လှုပ်ရှားမှုမှန်သမျှကို နောက်ယောင်ခံကာ စောင့်ကြည့်နေသော မော့ဆက်အဖွဲ့ဝင်တို့ကအာဂျင်တီးနားမှပေးပို့သော နောက်ဆုံးသတင်းများအရ လိုအပ်သော အစီအစဉ်များလုပ်ပေးရပြန်သည်။

အိုက်ခမန်းက်ို ပြန်ပေးဆွဲရန်လုပ်ငန်းအတွက် အီဆာကိုယ်တိုင်စိတ်ကြိုက်လူရွေး၍ တာဝန်ပေးခဲ့သည်။

အရွေးခံရသောလူများသည် သူတို့၏ ခေါင်းဆောင်နှင့်အတူ နိုင်ငံရပ်ခြားများတွင် အမှုထမ်းဖူးသူချည်းဖြစ်သည်။ အာရပ်နိုင်ငံနှင့်အခြားနိုင်ငံများအတွင်းအသက်စွန့်၍ အမှုထမ်းခဲ့ဖူးသူများသာ ဖြစ်သည်။

ထိုလုပ်ငန်းကြီးသည် အခက်ခဲဆုံးနှင့်အန္တရာယ်အများဆုံးဖြစ်သဖြင့် အမိန့်ဖြင့်လူမရွေးဘဲ မေးမြန်းပြီးကိုယ်တိုင်လုပ်ချင်ပါသည်ဟု ကမ်းလှမ်းလာသူများကိုသာ ရွေးချယ်ခဲ့သည်။

ထိုအဖွဲ့ကိုဦးဆောင်သူမှာ အစ္စရေးနိုင်ငံတွင်မွေးဖွားသော ဂျူးကွန်မန်ဒိုတစ်ယောက်ဖြစ်ပြီးအသက်(၁၂)နှစ်အရွယ်ကပင် ဤလုပ်ငန်းမျိုး လုပ်ကိုင်ခဲ့သည်ဟုဆိုရပေမည်။ သူငယ်ငယ်ကခိုးဝင်လာသော ဂျူးများချုပ်နှောင်ထားသည့်အကျဉ်းစခန်းတစ်ခုကိုဖွင့်၍ ထိုလူများကိုထုတ်သွားဖူးသည်။ ကောင်းမွန်စွာ စောင့်ကြပ်ကာကွယ်ထားသော ဗြိတိသျှရေဒါစခန်းတစ်ခုကိုလည်း ဖောက်ခွဲဖျက်ဆီးခဲ့လေသည်။

ထိုသူသည် အာရပ်တို့၏လက်ချက်ဖြင့် ဒဏ်ရာရသွားသဖြင့် ကင်းထောက်လုပ်ငန်းကိုလုပ်နေရာမှအီဆာ၏ ထောက်လှမ်းရေးအဖွဲ့ထဲရောက်လာသူဖြစ်သည်။

ထိုမော့ဆက်အဖွဲ့ငယ်ထဲမှ ကျန်အဖွဲ့ဝင်များသည် နာဇီတို့၏ ဂျူးသုတ်သင်ရေးမှလွတ်ကင်းလာသောသေရွာပြန်များ ဖြစ်ကြသည်။ သူတို့၏ ညီအစ်ကိုမောင်နှမများ မိခင်များကို နာဇီတို့က ပြန်လမ်းမရှိသော အကျဉ်းစခန်းများထဲသို့ သွတ်သွင်းလိုက်ကြသည်ကို မျက်မြင်တွေ့ကြုံခဲ့ကြသူများဖြစ်သည်။

အချို့မှာ မိသားစုတပြုံလုံး အသတ်ခံရပြီး လောကအလယ် တစ်ကောင်ကြွက်အဖြစ် ကျန်ရစ်ခဲ့သူများဖြစ်သည်။ ထိုသို့သော ပုဂ္ဂိုလ်များထဲတွင် ရှာလွန်ဒါနီဆိုသူလည်းပါသည်။ ရှာလွန်ဒါနီသည်ဟန်ဂေရီပြည်ဂျူးရပ်ကွက်များတွင်ကြီးပြင်းလာပြီး နာဇီတို့ဝင်ရောက်သိမ်းပိုက်ထားသောကာလတွင်ဂျူးအကျဉ်းစခန်းတစ်ခုမှတစ်ခုသို့ပြောင်းရွှေ့ချုပ်နှောင်ခြင်းခံခဲ့ရသူများ ဖြစ်သည်။ဒါနီ၏ဖခင်ကြီးသည် ဘာဂျင်ဘယ်(လ်)ဆင်ရှိ အဆိပ်ဓာတ်ငွေ့ခန်းထဲတွင် သေဆုံးခဲ့ရရှာလေသည်။စစ်ကြီးပြီးသည့်နောက် အကျဉ်းစခန်းထဲမှလွတ်လာသော်လည်း ခိုးဝင်လာသော သင်္ဘောတွင်ပါလာသူဒါနီနှင့်အခြားဂျူးတို့ကို ဗြိတိသျှစစ်သင်္ဘောတစ်စီးက ဖမ်းဆီးခဲ့သဖြင့် အကျဉ်းကျခံရပြန်သည်။

သူသည် သူ၏လူငယ်ဘဝကို ဗြိတိသျှဘုရင်ဧကရာဇ်ပိုင် ဆိုက်ပရပ်စ်ကျွန်းပေါ်ရှိ အကျဉ်းထောင်ထဲတွင်ကုန်ဆုံးခဲ့ရသည်။

ဒါနီ၏တာဝန်မှာ သူ၏အဖွဲ့ဝင်အတွက်နှင့် အိုက်ခမန်းအတွက် လိုအပ်သောစာရွက်စာတမ်းများ အတုပြုလုပ်ပေးခြင်းဖြစ်သည်။

အီဆာရွေးထားသည့် နောက်တစ်ယောက်မှာ ညီမရော ရင်သွေး(၃)ယောက်ပါ နာဇီတို့သတ်ဖြတ်ခြင်းခံခဲ့ရသူဖြစ်သည်။ ထိုသူသည် တစ်နေ့နေ့တစ်ချိန်ချိန်တွင် နာဇီများကိုကလဲ့စားချေမည်ဟု သစ္စာပြုထားသူပင်တည်း။ သူ၏တာဝန်မှာ အိုက်ခမန်းကို ကိုယ်ကာယအားသုံးလျက် ဖမ်းဆီးချုပ်နှောင်ရန်ပင်ဖြစ်သည်။

နောက်တစ်ယောက်မှာ ကလဲ့စားချေသူများ စုပေါင်းဖွဲ့စည်းထားသော ဟာနော့ကင်အဖွဲ့ဝင်တစ်ဦးဖြစ်ပြီး အီတလီပြည်တွင် ဗြိတိသျှစစ်တပ်ထဲအမှုထမ်းနေစဉ်မှာပင်နာဇီအတော်များများကိုဖြောင်ပစ်ခဲ့သူဖြစ်သည်။

အီဆာ၏ အဖွဲ့တွင် လူ(၃ဝ)ပါဝင်၍ (၁၂)ယောက်အပြည့်ပါသောအဖွဲ့ကကိုယ်ထိလက်ရောက်ဆောင်ရွက်မည်ဖြစ်ပြီး လူ(၂ဝ)ကျော်က အာဂျင်တီးနားနိုင်ငံတွင်းမှလိုအပ်သမျှကိုကူညီကြပေမည်။

အသေးစိတ်စုံစုံစေ့စေ့ပြင်ဆင်ထားပြီးပေပြီ။ လိုအပ်သော စာရွက်စာတမ်း လေယာဉ်ပျံအကူးအပြောင်း၊ ဗီဇာ၊ ကျန်းမာရေးလက်မှတ်များနှင့်ပတ်သက်၍ ပြဿနာမပေါ်စေရန် ဥရောပနိုင်ငံတစ်ခုတွင် အစ္စရေးခရီးသွားလုပ်ငန်း အေဂျင်စီတစ်ခု ဖွင့်လှစ်ထားလိုက်သည်။ ထိုဥရောပနိုင်ငံကို ယခုထက်တိုင်လျှို့ဝှက်ထားခဲ့ကြလေသည်။

မော့ဆက်အဖွဲ့ကို အစ္စရေးနိုင်ငံတွင်ရွေးချယ်၍ ဖွဲ့စည်းစေသည်ဟူသောအမြင်ကို အခြားနိုင်ငံများကမြင်သွားပါက ထိုစီမံကိန်းမအောင်မြင်လျှင် နိုင်ငံရေးဂယက်များ ထလာနိုင်ဖွယ်ရာရှိပေသည်။အာဂျင်တီးနားနိုင်ငံအနေနှင့်လည်း မိမိတို့တိုင်းပြည်ထဲမှလူတစ်ယောက်ကိုဖမ်းဆီးခေါ်ဆောင်သွားခြင်းသည် မိမိတို့၏ အချုပ်အခြာလွတ်လပ်မှုကိုချိုးဖျက်ခြင်းဖြစ်သဖြင့် ဒေါသပုန်ထကြပေမည်။

မည်သို့ပင်ဆိုစေ အီဆာ၌ တခြားနည်းလမ်းမရှိပါ။ အာဂျင်တီးနားရဲတို့ကို အသိပေးလိုက်ပါကအိုက်ခမန်းကိုဖမ်းမည်/မဖမ်းမည်ကို မည်သူအာမခံပေးမည်နည်း။ ဤအချက်ကိုအီဆာကသိထားသည်။

တောင်အမေရိကတိုက်တွင် သြဇာတိက္ကမ မရှိသူတော်တော်များများသည် နာဇီဝါဒထောက်ခံသူများဖြစ်ကြသည်။ တောင်အမေရိကသည် ဥရောပမှထွက်ပြေးလာသော ဘဏ်ဓားပြများ၊နိုင်ငံရေးသမားများနှင့် နာဇီစစ်ရာဇဝတ်ကောင်များ ခိုလှုံနေထိုင်လေ့ရှိသည့်ဒေသကြီးပင်ဖြစ်ပါသည်။

ပြင်ဆင်မှုလုပ်ငန်းကြီးသည် ဧပြီလကုန်တွင်ချောချောမောမောပြီးစီးသွားလေသည်။ မော့ဆက်အဖွဲ့ဝင်များသည် ကမ္ဘာအနှံ့မှ ရက်ခွာပြီး အာဂျင်တီးနား နိုင်ငံတွင်းသို့တဖွဲဖွဲရောက်လာကြသည်။ နိုင်ငံတစ်ခုတည်းမှလာသူများ ရှိသော်လည်း မြို့တစ်မြို့တည်းမှနှစ်ယောက်ပူး၍ မလာကြပါ။

ဗွေးနိုဇာရီမြို့သို့ရောက်သောအခါ မော့ဆက်အဖွဲ့ဝင်တို့သည်လုံခြုံစိတ်ချရသော အိမ်များ အသီးသီးငှားရမ်းနေထိုင်ကြသည်။ လုပ်ငန်းအဆင်ပြေရန် ကားများကိုလည်းငှားပြီး လူမရိပ်မိရန်မကြာခဏလဲလှယ်စီးကြကြလေသည်။

အိုက်ခမန်းကို လေယာဉ်ဖြင့်ခေါ်ထုတ်သွားရန် ကြံစည်ထားပြီးဖြစ်သည်။ အာဂျင်တီးနားနိုင်ငံ အနှစ်(၁၅ဝ)မြောက် ပွဲတော်တက်ရန် အစ္စရေးကိုယ်စားလှယ်အဖွဲ့တစ်ခုကို အစ္စရေးနိုင်ငံပိုင်L.Air လေကြောင်းမှ လေယာဉ်တစ်စီးဖြင့် ပို့ပေးမည်။ ပို၍ အခွင့်သာသည့်အချက်မှာယင်းလေယာဉ်ကို အာဂျင်တီးနားမှ မည်သည့်နေ့ရက်တွင်ထွက်ခွာရန်အမိန့်ကို အီဆာကပေးနိုင်ခြင်းပင်ဖြစ်သည်။

လေကြောင်းဖြင့်အဆင်မပြေလျှင် ရက်ပေါင်း(၆ဝ)ကြာသော ရေကြောင်းမှ သင်္ဘောဖြင့်ယူသည့်နည်းကိုသုံးကြပေမည်။

မေလ(၁၁)ရက်နေ့သို့ရောက်ပါပြီ။

အိုက်ခမန်းကိုဖမ်းရန် ဆုံးဖြတ်ချက်ချလိုက်သည်။

ညနေ မှောင်ရီပျိုးချိန် အိမ်သို့ပြန်လာသော အိုက်ခမန်းကိုဝိုင်းဝန်းဖမ်းချုပ်ပြီး အစ္စရေးတို့၏ လုံခြုံသောအိမ်တစ်အိမ်သို့ ကားဖြင့်ခေါ်ဆောင်သွားရမည်။

သမိုင်းတွင်လောက်သော စွန့်စားခန်းကြီး စတင်ပေပြီ။

ညနေ(၇)နာရီ (၃၄)မိနစ်တွင် ကားနှစ်စီးသည် အိုက်ခမန်းတို့နေသော ဂယ်ရီဘော်ဒီလမ်းအတွင်းရပ်ထားလိုက်သည်။ ကာတစ်စီးကို စက်ခေါင်းဖွင့်၍ လူနှစ်ယောက်က စက်ပျက်သည့်ပုံသဏ္ဌာန် ကြည့်ရှုနေကြသည်။ နောက်ခန်းထိုင်ခုံတွင် လူတစ်ယောက်က ခုန်ထွက်ရန်အသင့်အနေအထားယူထားသည်။

ကိုက်(၃ဝ)လောက်တွင် လူတစ်ယောက်သည် ကားတစ်စီးကိုစက်နှိုးမရသဖြင့် ကြည့်ရှုနေသည်။

အိုက်ခမန်းသည် ညနေ(၇)နာရီမိနစ်(၄ဝ)တွင်ဘတ်စ်ကားဖြင့်ပြန်ရောက်လာတတ်သည်။

ဘတ်စ်ကားပေါ်မှဆင်းပြီး အိမ်သို့လမ်းလျှောက်အပြန်သူ့ကိုဖမ်းရပေမည်။

ညနေ(၇)နာရီမိနစ်(၄ဝ)တွင် ဘတ်စ်ကား ဆိုက်လာသည်။ အိုက်ခမန်းတစ်ယောက်ပါမလာပါ။

မော့ဆက်အဖွဲ့ဝင်တို့၏ စိုးရိမ်မှုအရှိန်တက်လာသည်။ အိုက်ခမန်းသည် စီးနေကျကားကိုမမီလိုက်သည်လည်း ဖြစ်နိုင်သည်။ ထို့ကြောင့် နောက်ဘတ်စ်ကားတစ်စီးကိုစောင့်ရန် ဆုံးဖြတ်ကြသည်။

သို့သော် နောက်ဘတ်စ်ကားတစ်စီးတွင်လည်း သူပါမလာပြန်ချေ။

မော့ဆက်အဖွဲ့ဝင်တို့ အချင်းချင်း ဆွေးနွေးတိုင်ပင်ကြလေသည်။ သူတို့၏ကားများ လမ်းထဲကြာကြာရပ်ထားလျှင် ရိပ်မိစရာအကြောင်းရှိသည်။ ဤသို့ရိပ်မိသွားလျှင် ကြံစည်ထားသောလုပ်ငန်းကြီးတစ်ခုလုံး ရေစုန်မျောရပေတော့မည်။ ယခုအချိန်မှပြန်လှည့်ကြရန်မှာလည်း သိပ်မလွယ်ကူပါ။ နောက်မိနစ်အတော်ကြာ စောင့်ကြမည်။

ည(၈)နာရီတိတိတွင် နောက်ထပ်ဘတ်စ်ကားတစ်စီး ဝင်လာပေပြီ။ ကားရပ်လိုက်သည်နှင့်လူတစ်ယောက်ကားပေါ်မှဆင်းလာသည်။ ထိုလူသည် မော့ဆက်အဖွဲ့ဝင်တို့ဘက်သို့ဦးတည်လျှောက်လာလေသည်။

သူတို့လိုချင်သော လူဖြစ်ကြောင်း သိရှိလိုက်ပေပြီ။

တစ်ယောက်မှတုတ်တုတ်မလှုပ်ကြ၊ တိတ်ဆိတ်ငြိမ်သက်နေကြသည်။ အိုက်ခမန်းကို သူတို့လိုချင်သောနေရာသို့ရောက်လာသည်အထိ စောင့်နေကြသည်။

ဗြုန်းကနဲကားမီးနှစ်လုံးဖွင့်လိုက်သည်သဖြင့် အိုက်ခမန်း၏ မျက်လုံးတွေပြာသွားပြီးဘာမျှမမြင်ရတော့ချေ။ လူနှစ်ယောက်က သူ့ကိုညှပ်၍ ဖမ်းချုပ်လိုက်ကြလေရာ အိုက်ခမန်းသည်ကြောက်ကြောက်လန့်လန့်နှင့် တစ်ချက်သာ အော်လိုက်နိုင်လေသည်။နောက်ထပ်အသံမပြုလိုက်နိုင်မီ သူ့ကိုကားတစ်စီး၏နောက်ခန်းထဲသို့အတင်းတွန်းသွင်းလိုက်ပြီး မော့ဆက်အဖွဲ့ဝင်တစ်ဦးက အိုက်ခမန်း၏ဦးခေါင်းကို ဒူးနှစ်လုံးကြားထဲထည့်ပြီး ညှပ်ထားလိုက်သည်။ မျက်မှန်အမည်းတစ်လက်တပ်ပေးလိုက်သဖြင့် အိုက်ခမန်းသည် သူ့ကိုဖမ်းသူများ၏ရုပ်သွင်ကို မမှတ်မိတော့ချေ။ အိုက်ခမန်းကို စောင်တစ်ထည်ဖြင့်အုပ်လိုက်ပြီး ကား၏ကြမ်းပြင်ပေါ်တွင်ချထားလိုက်သည်။

ကျန်ထောက်လှမ်းရေးသမားတစ်ဦးက ကိုယ်ကိုကိုင်းညွတ်ကာ အိုက်ခမန်း၏ နားနားကပ်ပြီးဂျာမန်လိုပြောလိုက်သည်။

" ခင်ဗျား မလှုပ်နဲ့နော်၊ လှုပ်တာနဲ့ ကျည်ဆံတွေ ခင်ဗျားဗိုက်ထဲ အပြုံလိုက်ပစ်သွင်းလိုက်မယ်သိလား"

အဖမ်းခံရပြီး တစ်နာရီပင်မကြာသောကာလတွင်း အိုက်ခမန်းသည် ဗွေးနိုဇာရီမြို့စွန်တစ်နေရာရှိအိမ်တစ်အိမ်ထဲမှအိပ်ရာပေါ်တွင် မျက်လုံးကိုပိတ်လျက်လဲလျောင်းနေပေပြီ။သူ၏ ခြေထောက်တစ်ဘက်ကို ခုတင်ခြေထောက်တစ်ချောင်းတွင် ပူးတွဲသော့ခတ်ထားလိုက်သည်။

သူဝတ်ဆင်လာသောအဝတ်အစားများကို အားလုံးချွတ်၍ မကြာမီက ဝယ်ထားသော ညဝတ်အင်္ကျီတစ်စုံနှင့် လဲလှယ်ဝတ်ဆင်ထားလိုက်သည်။အိုက်ခမန်း၏ ချိုင်းအောက်နားတွင်သူ၏ စစ်ပုလိပ်အဖွဲ့ဝင်နံပါတ်ကိုတွေ့ရလိမ့်မည်ဟု မော့ဆက်အဖွဲ့ဝင်တို့မျှော်လင့်ထားသော်လည်း မတွေ့ရပါ။ ထိုနေရာတွင်အမာရွက်ငယ်တစ်ခုသာ တွေ့ရှိရလေသည်။

စစ်အပြီး၌ အမေရိကန်တပ်များ သူ့ကိုခေတ္တဖမ်းဆီးထားစဉ်က သူသည် ထိုနံပါတ်ကို ဘလိတ်ဓားဖြင့်လှီးထုတ်လိုက်ကြောင်း အိုက်ခမန်းက ရှင်းပြရှာသည်။

မော့ဆက်အဖွဲ့ဝင်တို့သည် အိုက်ခမန်း၏ ဇာတိရုပ်ဖြစ်ရပ်မှန်/မမှန်ကို အချက်အလက်တစ်ခုချင်းနှိုင်းယှဉ်၍ စိစစ်လေ့လာသောအခါ အားလုံးကွက်တိဖြစ်နေသည်ကိုတွေ့ရှိကြလေသည်။

သူတို့သည် အိုက်ခမန်းအား အံ့သြစရာ၊ ရွံ့မုန်းစရာကောင်းသောပုဂ္ဂိုလ်တစ်ဦးအဖြစ် တွေ့မြင်ကြရသည်။ အဘယ့်ကြောင့်ဆိုသော် သူသည်မော့ဆက်အဖွဲ့ဝင်တို့အားကျိုးနွံစွာ ဆက်ဆံနေသောကြောင့်ဖြစ်သည်။

တချိန်က ရာပေါင်းများစွာသောလူများကို အမိန့်ပေးခဲ့သည့် ဂျာမန်စစ်ပုလိပ်အဖွဲ့အရာရှိကြီးများ၏ဝင့်ဝါမောက်မာမှုသည်လည်း ကြက်ပျောက်ငှက်ပျောက်ကွယ်ပျောက်ခဲ့လေပြီ။ ယခုမူသူသည်ထိတ်လန့်ကြောက်ရွံ့နေပြီး တုန်တုန်ရီရီဖြစ်နေသည်။ တခါတရံ သူ့ကိုကူညီပါရန် တောင်းပန်နေရှာပြန်သည်။ အိုက်ခမန်းသည် သူ့ကိုဖမ်းဆီးလာသူတို့မေးသမျှကိုဖြေကြားခဲ့လေသည်။

" ကျုပ်ရဲ့ နာဇီပါတီပါတီဝင်နံပါတ်ဟာ (၈၈၉၈၉၅)ဖြစ်ပါတယ်။

ကျုပ်ရဲ့ (S.S)အဖွဲ့ဝင် နံပါတ်တွေကတော့ (၄၅၃၂၆)နဲ့ (၆၃၇၅၂)ပါဘဲ။

ကျုပ်နာမည် အဒေါ့ဖ်အိုက်ခမန်း ဖြစ်ပါတယ်"

အစ္စရေး ထောက်လှမ်းရေးအဖွဲ့ဝင်တို့က အိုက်ခမန်း၏ သူလိုငါလိုသာမညရုပ်မျိုးနှင့်လူက ထောင်ပေါင်းများစွာသော လူများကိုသတ်ဖြတ်ခဲ့သည်ဆိုသောအချက်ကိုမယုံကြည်နိုင်ပါ။ အချို့တို့မှာ စစ်ဆေးမေးမြန်းချိန်၌ပင် ဖျားချင်စိတ်များပေါ်လာရသည်။ သူတို့အတွက်အဆိုးဆုံးသောအချိန်ကာလသည်ကား အိုက်ခမန်းက ဂျူးဘာသာရေး ဆုတောင်းစာများကိုဟီးဘရူးဘာသာဖြင့် ရွက်ဆိုပြသော အချိန်ပင်ဖြစ်သည်။

အိုက်ခမန်းသည် ဟီးဘရူးဘာသာစကားကို ရာဘိုင်ခေါ် ဂျူးဘာသာရေးဆရာတစ်ဦးထံမှသင်ယူလာခဲ့သည်ဟုဆိုသည်။

အိုက်ခမန်းကို ထိုအခန်းထဲတွင် တစ်ပတ်ကြာ ချုပ်ထားပြီး ၂၄ နာရီလုံးလုံး အစောင့်အကြပ်ချထားခဲ့လေသည်။အစ္စရေးတို့သည် အိုက်ခမန်းကို မျက်စိအောက်မှ အပျောက်မခံခဲ့ပါ။ နောက်ဆုံး ကုန်ကုန်ပြောရလျှင်အိမ်သာဝင်သည်ကိုပင် အစောင့်တစ်ယောက် လိုက်ပါ စောင့်ကြပ်လေသည်။ သူနေသော အခန်းထဲတွင်မီးကိုအမြဲဖွင့်ထားလိုက်သည်။ အခန်း၏ တစ်ခုတည်းသောပြတင်းပေါက်ကို ကန့်လန့်ကာဆွဲချ၍သံရိုက်ထားလိုက်သည်။ အိမ်ဘေးမှကားရုံထဲတွင် အရေးကြုံပါက ထွက်ပြေးနိုင်ရန် ကားတစ်စီးအဆင့်သင့်ရပ်ထားခဲ့သည်။

ထိုရက်သတ္တပတ်တစ်ပတ်အတွင်း မော့ဆက်အဖွဲ့ဝင်တို့သည် အီဆာ၏ အမိန့်အရ ထိုသူအားစစ်ဆေးစုံစမ်းမှုပြုကာ အိုက်ခမန်းအစစ်ဖြစ်ကြောင်း ဆုံးဖြတ်ချက်ချလိုက်သည်။

ဤသို့စစ်ဆေးမေးမြန်းနေစဉ်ကာလတွင် အိုက်ခမန်း၏ အလွန်ထိတ်လန့်တုန်လှုပ်သွားသည့်အချိန်များရှိခဲ့သည်။ ထိုအချိန်များ၌ သူ့ကိုဖမ်းဆီးထားသူများသည် သူ့ကိုပစ်သတ်ကြတော့မည်ဟု အိုက်ခမန်းယုံကြည်ခဲ့လေသည်။ ထို့ကြောင့် အစားအစာများကိုပင် အဆိပ်ခတ်ထားမည်စိုးသဖြင့်အိုက်ခမန်းကမစားလိုကြောင်း ငြင်းဆန်ခဲ့သေးသည်။ သူမစားမီ တစ်ယောက်ယောက်ကစားပြရန်လည်း တောင်းဆိုခဲ့လေသည်။

အိုက်ခမန်းကိုဖမ်းထားသော အစ္စရေးထောက်လှမ်းရေးအဖွဲ့ဝင်တို့အတွက်လည်းထိုရက်သတ္တပတ်သည် အလွန်စိတ်ဆင်းရဲရသောအချိန်ပင်ဖြစ်သည်။ အိုက်ခမန်းကိုတွေ့လိုက်တိုင်းသူတို့၏ မိသားစုများ ကြုံတွေ့ခံစားခဲ့ရသည့်လူ့ငရဲခန်းများကိုသတိရမိကြသည်။စိတ်ခိုင်လှပါသည်ဆိုသော ပုဂ္ဂိုလ်သည်ပင် မကြာခဏဆိုသလိုအိမ်အပြင်ထွက်၍ လမ်းလေးဘာလေး လျှောက်ပေးရလေသည်။ ထိုအဖြစ်ကိုရိပ်မိသော အီဆာသည်သူ့လူများအား ဗွေနိုးဇာရီမြို့တော်အတွင်း အလှည့်ကျ လည်ပတ်ကြည့်ရှုရန် ခွင့်ပြုခဲ့သည်။

မည်သို့ပင်ဆိုစေ တာဝန်အရ ရန်သူဟုသတ်မှတ်ထားသောလူများကိုပင်ဖြောင်ပစ်ခဲ့သည့် ဒေါင်ဒေါင်မြည်ထောက်လှမ်းရေးအဖွဲ့ဝင်တို့သည်စစ်ဆေးမေးမြန်းနေစဉ် မမျှော်လင့်သောအချိန်များ၌ မျက်ရည်ကျခဲ့ရသဖြင့်သူတို့၏ မျက်နှာကိုလက်ဖြင့်အုပ်ကာ ဣနြေ္ဒဆည်ကြရရှာသည်။

အိုက်ခမန်းအတွက် နေ့စဉ်သူစားနေကျ အစားအစာများဖြစ်သည့်စွတ်ပြုတ်၊ ကြက်ဥ၊ကြက်သားပြုတ်နှင့်အာလူးတို့ကို ချက်ပေးရသူမှာ မော့ဆက်အဖွဲ့ဝင် အမျိုးသမီးထောက်လှမ်းရေးမယ်တစ်ဦးဖြစ်လေသည်။ တစ်ကြိမ်၌မူ ဂျူးလူမျိုး မြောက်မြားစွာတို့ကို သေမင်းခံတွင်းသို့ပို့ဆောင်ခဲ့သူဤသေမင်းတမန်အိုက်ခမန်းကို အဆိတ်ခတ်သတ်ရန် တစ်စုံတစ်ယောက်က သူမကို သွေးဆောင်တိုက်တွန်းခဲ့သည်ဟုဆိုလေသည်။

သို့သော် မော့ဆက်အဖွဲ့ကြီး၏စည်းကမ်းကို အဖွဲ့ဝင်တို့လိုက်နာကြရမည်။ အီဆာကလည်း ထိုသို့ယုံကြည်ထားပြီး ဖြစ်ပါသည်။ ဤသို့မဟုတ်ခဲ့လျှင် ထိုထိုသော ကြေကွဲစရာများ ကြုံတွေ့ခံစားရင်းတာဝန်များဝတ္တရားများကို ကျေပွန်စွာထမ်းဆောင်နိုင်ခဲ့သည့် သူ့လူများ၏အရည်အချင်းများကိုကိုယ်တိုင်စိစစ်ရွေးချယ်ထားသည့်အချက်အလက်သည် အချည်းနှီးဖြစ်မည်မဟုတ်ပါလော

အိုက်ခမန်းကိုဖမ်းဆီးရမိပြီး (၄)ရက်အကြာ၌ အီဆာသည် ပထမဦးဆုံးအနေဖြင့် သူ့ကိုလာရောက်ကြည့်ရှုလေသည်။ အိုက်ခမန်းကိုမြင်တွေ့လိုက်ရသော အီဆာ၏ စိတ်ထဲ၌ ဒေါသလည်းမဖြစ်၊ မုန်းတီးခြင်းလည်း မဖြစ်ပေါ်ခဲ့ဟုဆိုလေသည်။

" သူနဲ့ပတ်သက်ပြီး ကျွန်တော့်စိတ်ထဲဖြစ်ပေါ်မိတာက သူဟာ ထူးထူးခြားခြားမရှိတဲ့ သာမန် သူလိုငါလိုလူတစ်ယောက်ဖြစ်တယ်ဆိုတဲ့အချက်ပါပဲ"

အီဆာသည် အိုက်ခမန်းနှင့်ပတ်သက်၍ စိတ်ထဲဝယ်မဖြုံရေးချ မဖြုံ။ နောက်တစ်ဆင့်ဖြစ်သောအိုက်ခမန်းကိုခိုးထုတ်မည့်ကိစ္စကို ပိပိရိရိဆောင်ရွက်အကောင်အထည်ဖော်သွားရန်ဆုံးဖြတ်လိုက်သည်။

အစ္စရေး L.Air လေကြောင်းကုမ္ပဏီပိုင်လေယာဉ်သည် ဗွေနိုဇာရီမြို့မှ မေလ(၂ဝ)ရက်တွင်ပြန်ထွက်မည်။ အိုက်ခမန်းကိုဖမ်းပြီး (၉)ရက်မြောက်နေ့တွင်ဖြစ်သည်။

လေယာဉ်ထွက်ခွာမည့်ရက်ကို ရှေ့သို့ရွှေ့လိုက်လျှင် အာဂျင်တီးနားအစိုးရ ရိပ်မိသွားမည်ကိုစိုးရိမ်ရသည်။

အိုက်ခမန်း၏မိသားစုသည် အိုက်ခမန်းပျောက်နေခြင်းကိုသိရှိသွားနှင့် ချက်ချင်း ရဲစခန်းသို့အကြောင်းကြားမည်မဟုတ်ဟု အီဆာက တွက်ပြီးသားဖြစ်သည်။ ပြန်ပေးဆွဲခံရသည်ဟု ရဲကိုတိုင်လျှင် ကျန်ရစ်သူမိသားစုသည် အိုက်ခမန်း၏ နောက်ကြောင်းကို အနည်းငယ်ပြန်ပြောပြရပေမည်။ထိုအခါ အိုက်ခမန်းဟူသောနာမည်သည် သတင်းစာထဲပါသွားသည်နှင့် တစ်ကမ္ဘာလုံးဂယက်ရိုက်ခတ်သွားတော့မည်မှာ ဧကန်စင်စစ်ဖြစ်ပေသည်။ ဤသို့သော အခြေအနေမျိုးတွင်အိုက်ခမန်းကို ချက်ချင်း လက်စတုံး ဖြောင်ပစ်ရတော့မည်။

မော့ဆက်အဖွဲ့ခေါင်းဆောင်ဖြစ်သူ အီဆာ မျှော်လင့်ထားသည့်အတိုင်းပင်ဖြစ်လေသည်။ အိုက်ခမန်း၏မိသားစုသည် ချက်ချင်း ရဲကိုအကြောင်းမကြားရဲကြပါ။ သူတို့နေထိုင်ရာရပ်ကွက်ရှိ ဆေးရုံများနှင့်ဆေးတိုက်များသို့သွားရောက်ကာ ရီကာဒိုကလီးမင့်တစ်ယောက်ကားတိုက်ခံရလေသလောဟု စုံစမးသတင်းမေးကြသည်။ ရဲတို့ထံ လုံးဝသတင်းမပေးဘဲ မိတ်ဆွေအပေါင်းအသင်းတို့ထံ မေးမြန်း အကူအညီတောင်းကြသည်။

ဤနေရာတွင်လည်း အီဆာ၏တွက်ကိန်း မှန်သည်။ အိုက်ခမန်းကဲ့သို့ခြေရာဖျောက်ကာပုန်အောင်းနေရသော နာဇီတို့သည် အိုက်ခမန်းအတွက်ကူညီရန် လုံးဝမကြိုးစားကြပါ။

အီဆာ တွေးဆထားသလို သူတို့လည်း တောင်အမေရိကတိုက်အနှံ့အပြားတွင်အသက်လုပြေးနေကြရသည်မဟုတ်ပါလော။ တချို့တို့မှာ ဥရောပတိုက်သို့ပင်ခြေဦးပြန်လှည့်ကာ ပြေးနေကြသည်။ ဟစ်တလာ၏ နောက်လိုက်များကိုဖမ်းဆီးခဲ့သည့်အဖွဲ့အစည်းသည် တောင်အမေရိကတိုက်သို့ အနံ့ခံကာလိုက်လာပြီးတော့ သူတို့ကိုလိုက်လံရှာဖွေသူများသည် မည်သူမည်ဝါဖြစ်ကြောင်း သူတို့သိရှိပါသည်။ တောင်အမေရိကတိုက်သို့ပင်တကူးတက အပင်ပန်းခံလိုက်လာနိုင်သူများမှာ အစ္စရေးနိုင်ငံသားတို့ပင်ဖြစ်ရမည်။

အိုက်ခမန်း၏သား နီကိုးလတ်စ်က နောင်အခါ ဤသို့ဖွင့်ဟပြောဆိုခဲ့လေသည်။

" ကျွန်တော့်ဖခင်ရဲ့ နာဇီမိတ်ဆွေတွေဟာ ကြက်ပျောက်ငှက်ပျောက်ပျောက်ကုန်ကြတယ်လေ၊သူတို့ထဲက အများစုဟာ ဥရုဂွေးနိုင်ငံကိုပြေးကုန်ကြတယ်။ သတင်းအစအနပင် မကြားရတော့ဘူး"

မော့ဆက်အဖွဲ့ကြီးက လိုချင်နေသော နာဇီထိပ်သီးတစ်ဦးဖြစ်သည့် ဂျိုးဇက်မင်ဂလီကိုထိုအချိန်က ဗွေနိုးဇာရီမြို့တော်တွင်တွေ့ရှိခဲ့သည်ဟုဆိုလေသည်။

အိုက်ခမန်းကိုဖမ်းပြီဟုသတင်းသည် ဂျိုးဇက်မင်ဂလီအား သတိပေးလိုက်သလိုဖြစ်သွားလေရာ သူ့ကိုဖမ်းတော့မည်ဟူသော မော့ဆက်အဖွဲ့၏ မျှော်လင့်ချက်ရောင်ခြည်များမှာလည်း ပျောက်ကွယ်သွားရတော့သည်။

ဂျိုးဇက်မင်ဂလီအနေဖြင့် ခြေရာဖျောက်ပြေးရမည့်အကြောင်းက ရှိနေပါသည်။ အော့ရှဝဒ်ဇ်အကျဉ်းစခန်းကြီးထဲ၌ ဂျူးမိန်းမနှင့်ကလေးငယ်များကိုအသုံးပြုကာသူပြုလုပ်ခဲ့သော ဆေးပညာဆိုင်ရာ စမ်းသပ်မှုများသည် အလွန်စက်ဆုပ်ရွံရှာဖွယ်ကောင်းလှ၏။ဂျိုးဇက်မင်ဂလီ၏ ရွေးချယ်ခြင်းဆိုသည်မှာကားမည်သူ့ကို ချက်ချင်းသတ်ပစ်ရမည်၊ မည်သူ့ကိုအလုပ်လုပ်ခိုင်းရမည်၊မည်သူ့ကိုခွဲစိတ်ခန်းထဲပို့၍ အစမ်းသပ်ခံရမည်ဟူသော ရွေးချယ်ခြင်း (၃)မျိုးဖြစ်ပါသည်။

အိုက်ခမန်းကို အာဂျင်တီးနားနိုင်ငံပြင်ပသို့ မည်သို့မည်ပုံခိုးထုတ်ရမည်ကို ဂရုတစိုက်ကြိုတင်ကြံစည်ပြင်ဆင်ထားပြီးဖြစ်သည်။

မော့ဆက်အဖွဲ့ဝင်တစ်ဦးကို ကားတိုက်ခံရ၍ ဦးနှောက်ထိခိုက်သွားသည်ဟုဆိုပြီးရပ်ကွက်ဆေးရုံတစ်ခုတွင်တင်ထားလိုက်သည်။ မော့ဆက်၏ ဆရာဝန်တစ်ဦးကထိုသူ၏ဆွေမျိုးတစ်ယောက်အနေနှင့် နေ့တိုင်းသွားရောက်ကြည့်ရှုပြီး မည်သို့သော ရောဂါလက္ခဏာလုပ်ပြရမည်ကို ပညာပေးခဲ့သည်။ ဆေးရုံတွင်ဆေးဝါးကုသမှုခံယူရင်းတဖြည်းဖြည်း ရောဂါသက်သာလာသည့်ဟန်ဆောင်ရမည်ဖြစ်ပေသည်။

မေလ ၂ဝ ရက်နေ့နံနက်။

ထိုဝေဒနာရှင်သည် အလွန်သက်သာ ကျန်းမာလာပြီဖြစ်သဖြင့် သူ၏ဆရာဝန်များကသူ့အား ဆေးရုံဆင်းခွင့်ပြုခဲ့သည်။ ထိုသူအား လိုအပ်သော စာရွက်စာတမ်းများ ထုတ်ပေးလိုက်သည်။

ထို့ပြင်ထိုသူ၏ မေတ္တာရပ်ခံမှုကြောင့် သူ့နိုင်ငံဖြစ်သော အစ္စရေးနိုင်ငံသို့ လေယာဉ်ဖြင့်ပျံသန်းထွက်ခွာခွင့်ကိုပါ ဆရာဝန်းများက ထောက်ခံပေးလိုက်သည်။

ထိုဝေဒနာရှင်ဆေးရုံဆင်းပြီးသည်နှင့် သူ၏စာရွက်စာတမ်းများကို မော့ဆက်အဖွဲ့ကယူပြီးအိုက်ခမန်း၏ဓာတ်ပုံနှင့် အခြားကိုယ်ရေးရာဇဝင်အချက်အလက်များ ဖြည့်သွင်းအစားထိုးလိုက်လေသည်။

ထိုအချိန်၌ အိုက်ခမန်းသည် အလွန်ပင်အစွယ်ကျိုးနေပြီဖြစ်သဖြင့်သူ၏ ဇာတိဇစ်မြစ်အမှန်ကိုဖွင့်ဟဝန်ခံသော စာတစ်စောင်ကို လက်မှတ်ရေးထိုးပေးသည်။ ထို့ပြင်အစ္စရေးနိုင်ငံသို့လိုက်ပါလျက်တရားဥပေဒေကိုရင်ဆိုင်ရန်အဆင်သင့်ရှိကြောင်း အောက်ပါအတိုင်း ကတိပြုခဲ့လေသည်။

" ကျွန်တော့်ဝန်ခံချက်ကို ကျွန်တော့်စိတ်ဆန္ဒအတိုင်း ပြုလုပ်ခြင်း ဖြစ်ပါတယ်။ ကျွန်တော့်ကိုခြိမ်းခြောက်ခြင်း၊ အပေးအယူသဘော ကတိပြုခြင်းများမပါဘဲ ဝန်ခံကတိပြုတာပါ။ ကျွန်တော့်ရဲ့အတွင်းစိတ်မှာ သာယာငြိမ်းချမ်းရေးကိုသိပ်လိုလားနေပါပြီ။ အစ္စရေးနိုင်ငံရောက်ရင်တရားဥပဒေအရခုခံချေပခွင့်ရမယ်လို့ ကျွန်တော်နားလည်းပါတယ်.."

အစ္စရေးနိုင်ငံသို့ရောက်ပြီးနောက် အိုက်ခမန်းသည် အောက်ပါအတိုင်း ပြောဆိုပြန်သည်။

"ကျွန်တော့်ကိုဖမ်းမိသွားတဲ့အဖွဲ့အစည်းဟာ သိပ်ပြီး ကျွမ်းကျင်ပိရိတဲ့အဖွဲ့ပါပဲ။ ပြင်ဆင်မှုတွေလုပ်တဲ့နေရာမှာလည်း စံနမူနာတင်ထိုက်ပါတယ်။ ကျွန်တော့်ကို ရိုက်ဖို့ပုတ်ဖို့ဆိုတာ ဝေလာဝေးပါပဲ။ထိခိုက်ဒဏ်ရာရမှာကိုစိုးရိမ်လို့ သူတို့ကျွန်တော့်ကိုဂရုတစိုက်စောင့်ကြည့်နေပါတယ်။ကျွန်တော့အထင်ကို ကျွန်တော်ပွင့်ပွင့်လင်းလင်း ပြောတာပါပဲ။ ကျွန်တော်ကိုယ်တိုင်ကလည်းဒီလုပ်ငန်းနဲ့ထောက်လှမ်းရေးလုပ်ငန်းတွေမှာ အတွေ့အကြုံရှိခဲ့လို့သိတာပါ။"

အာဂျင်တီးနား အကောက်ခွန်အရာရှိများ၊ နိုင်ငံကူးလက်မှတ်စစ်ဆေးသော အရာရှိများ၊ ထို့ပြင်လေဆိပ်ပတ်လည်ချထားသော လုံခြုံရေးတာဝန်ကျသူများကိုကျော်ဖြတ်၍ အိုက်ခမန်းကိုခိုးထုတ်သွားရန်တာဝန်မှာအီဆာအတွက် တစ်သက်တာတွင် အခက်ခဲဆုံး တာဝန်ကြီး ဖြစ်သည်။

ထို့ကြောင့်သူသည် လေဆိပ်ရှိအမှုထမ်း စုပေါင်းစားသောက်ခန်းထဲရှိ စားပွဲတစ်လုံးတွင် တစ်နေကုန်ထိုင်ပြီး မော့ဆက်ဌာနချုပ်ငယ်တစ်ခုဖွင့်ထားလိုက်သည်။

စားသောက်ဆိုင်ထဲသို့ဝင်ထွက်စားသောက်နေသော စစ်သားများ၊ ရဲများနှင့်လေဆိပ်မှအမှုထမ်းများသည် မလောက်လေးမလောက်စား လူပုပုလေးတစ်ဦးက တစ်နေကုန်ထိုင်ပြီး အမိန့်တွေထုတ်လိုက်၊ အခြေအနေတိုးတက်မှုကိုတင်ပြလာသော အစီရင်ခံစာများကိုဖတ်လိုက် စဉ်းစားလိုက်လုပ်နေသည်ကို သိရှိသွားလျှင် အလွန်ပင်အံ့သြသွားကြမည်ဖြစ်သည်။

သူ၏ဘေးတွင်မူ လက်မှတ်တုဝိဇ္ဇာ ရှာလွန်ဒါနီသည် နိုင်ငံကူးလက်မှတ်အတုများကို နောက်ဆုံးအနေဖြင့်ပြင်ဆင်မှုများပြုလုပ်ကာ အာဂျင်တီးနား အစိုးရက တရားဝင်တံဆိပ်ရိုက်နှိပ်ထုတ်ပေးသောစာရွက်စာတမ်းများဖြစ်လာအောင် ကြိုးစားနေလေသည်။

ထိုအချိန်၌ အိုက်ခမန်းကို ဂရုတစိုက်ရေမိုးချိုး၊ မုတ်ဆိတ်နှင့်နှုတ်ခမ်းမွှေး သပ်သပ်ရပ်ရပ်ရိတ်ပေးပြီးအစ္စရေး L.Air လေကြောင်းကုမ္ပဏီ၏ ယူနီဖောင်းကိုဝတ်ဆင်ပေးထား၏။ မော့ဆက်ဆရာဝန်တစ်ဦးက ဆေးထိုးအပ်သေးသေးတစ်ချောင်းသုံးပြီး အိုက်ခမန်း၏အာရုံများမှုန်ဝါးဝါးဖြစ်သွားအောင် ဆေးထိုးပေးလိုက်သည်။ဆေးထိုးပြီးသည်နှင့် အိုက်ခမန်းသည် မိမိပတ်ဝန်းကျင်တွင်ဘာဖြစ်နေနေ မသိရှိတော့ပေ။သို့သော် ဘေးက လူနှစ်ယောက်တွဲထားပါက သူလမ်းလျှောက်နိုင်သေးသည်။

အိုက်ခမန်းသည် မည်မျှလိုက်လျောလာသနည်းဟူမူ တစ်ချိန်တွင် သူ့အား လေကြောင်းကုမ္ပဏီ၏ယူနီဖောင်းဝတ်ပေးရန်မေ့နေသော မော့ဆက်အဖွဲ့ဝင်တို့အား အောက်ပါအတိုင်း သတိပေးခဲ့လေသည်။

" ကျန်တဲ့လူတွေအားလုံး ယူနီဖောင်းအပြည့်အစုံဝတ်ထားပြီး ကျုပ်တစ်ယောက်တည်း မဝတ်ထားရင်သူများတွေရိပ်မိသွားမှာပေါ့"

အိုက်ခမန်းက ဤသို့ပင်မော့ဆက်အဖွဲ့ဝင်တို့ကိုလက်ချာ ပြန်ရိုက်နေပြန်သည်။

အိုက်ခမန်းပါသောကားကို အလယ်ကထား၍ ကား(၃)စီး တန်းပြီး အစ္စရေးလေကြောင်းကုမ္ပဏီ၏အမှုထမ်းများ လေဆိပ်သို့ထွက်လာပါပြီ။ ကားတန်းသည် လေဆိပ်ရှိအမှုထမ်းများဝင်ပေါက်သို့ တောက်လျှောက်မောင်းသွားသည်။အစောင့်စခန်းနားသို့ရောက်ခါနီးတွင် ပထမကားထဲမှလူများသည် တေးတကြော်ကြော်ဆို၍ အော်ဟစ်ရယ်မောကြလေသည်။ ကားမောင်းသူသည်စိတ်ပျက်သည့်ဟန်ဖြင့်သူ့လူတွေ ယနေ့ညလေယာဉ်ဖြင့်အိမ်ပြန်ရမည်ကိုပင် မေ့လောက်အောင် ဗွေနိုးဇာရီမြို့တော်တွင် အပျော်ကျူးခဲ့သည်ဟုအစောင့်များကိုရှင်းပြသည်။

အချို့မှာ လမ်းတလျှောက်လုံး အိပ်လိုက်လာလေသည်။ ထို့ကြောင့်အစောင့်များက ကိုယ့်လူတွေဒီအတိုင်းသာဆို လေယာဉ်ပျံမောင်းလို့ရပါ့မလားဗျို့ဟုနောက်ပြောင်ကြသည်။

ကားမောင်းသူက ပြန်ပြောလိုက်သည်။

" ဒီအတွက်တော့အိုကေပဲဆရာရေ ဒီလူတွေက အလှည့်ကျ လေယာဉ်အမှုထမ်းတွေပါ။ သူတို့လေယာဉ်ပေါ်မှာ အိပ်လိုက်သွားရုံပါပဲ"

အစောင့်သည် ပြုံးဖြဲဖြဲလုပ်ကာ ကားတန်းကိုစစ်ဆေးရန်လက်ပြလိုက်သည်။ သူသည်သူ၏အဖော်အစောင့်တစ်ယောက်ကို နောက်ကားထဲ၌ တစ်ဦးကိုတစ်ဦး ဖေးမတွယ်ဖက်ကာ လိုက်ပါသွားသောလူ(၃)ယောက်ကို လက်ညှိုးထိုးပြလိုက်သေးသည်။ ပျော်စရာကောင်းသော ဗွေနိုးဇာရီမြို့တွင်သူတို့အပျော်ကြူးခဲ့ကြပေသည်။

လေယာဉ်အမှုထမ်းအတုတို့သည် အိုက်ခမန်းကိုအလယ်တွင်ညှပ်ပြီး လေယာဉ်ဆီသို့ခေါ်သွားကြသည်။ သန်မာတောင့်တင်းသော မော့ဆက်အဖွဲ့ဝင်(၂)ဦးက တစ်ဘက်တစ်ချက်မှ မိမိတို့၏လက်မောင်းများဖြင့်ဖေးမကာ အိုက်ခမန်းအား လေယာဉ်လှေကားကိုတက်စေသည်။သဘောကောင်းသော လေဆိပ်အရာရှိတစ်ဦးက လေယာဉ်ပေါ်တက်သော လှေကားထစ်များကိုမြင်ရအောင် ဆလိုက်မီးမောင်းထိုးပေးလိုက်ရာ မော့ဆက်အဖွဲ့ဝင်တို့၏ ရင်ထဲတွင်ထိတ်ကနဲဖြစ်သွားရသည်။

အချို့က အပေါ်ကဆွဲပြီး အချို့က အောက်က တွန်းတင်ကြသောအခါ အိုက်ခမန်းသည်လေယာဉ်ထဲသို့ရောက်သွားသည်။ ထို့နောက်သူတို့သည် အိုက်ခမန်းကို ပထမတန်းရှိပြတင်းပေါက်နေရာတွင်နေရာချထားလိုက်သည်။ သူတို့ဘေးပတ်ပတ်လည်တွင်လေယာဉ်အမှုထမ်းအတုများသည် အိပ်မောကျသည့်ဟန်ဆောင်၍ နေရာယူထားလိုက်လေသည်။ လေယာဉ်မှူးဖြစ်သူသည်ထိုနေရာရှိမီးလုံးများကို မှိတ်ပစ်လိုက်သည်။ထိုအချိန်တွင်လေယာဉ်အမှုထမ်းအစစ်တို့သည် အကောက်ခွန်ဌာနှင့်နိုင်ငံကူးလက်မှတ်စစ်ဆေးသောကောင်တာတို့တွင် တစ်ယောက်ပြီးတစ်ယောက်အစစ်ခံနေကြသည်။

အစစအရာရာ ချောချောမောမော ဖြစ်နေပေပြီ။

နောက်ဆုံးတွင်အီဆာသည် သူ၏ သက်သေခံစာရွက်စာတမ်းများကိုထိုးပေးပြီးအစစ်ဆေးခံလိုက်ကာ လေယာဉ်ပေါ်သို့တက်လိုက်လေသည်။

လေယာဉ်ပျံထွက်ရန်အဆင့်သင့်ဖြစ်နေပါပြီ။ရုတ်တရက်ဆိုသလို တာဝန်ရှိပုဂ္ဂိုလ်များဟုထင်ရသော လူတစ်စုသည် လေယာဉ်ဆီသို့အမြန်ပြေးလာနေသည်။ အီဆာနှင့်သူ့လူများသည်ခြေဖျားလက်ဖျား အေးသွားရလေသည်။ထိုပုဂ္ဂိုလ်များသည် မည်သည့်ကိစ္စဖြင့်လာပါစေ၊ နောက်ကျသွားပြီဖြစ်သည်။ လေယာဉ်စက်သံများမိုးချုန်းသံကဲ့သို့မြည်ဟီးသွားကာ လေယာဉ်ကြီးသည် ပြေးလမ်းတလျှောက်တဟုန်ထိုး ပြေးတက်သွားပြီး တခဏချင်းမှာပင် လေထဲသို့ပျံတက်သွားလေသည်။

ညသန်းခေါင်ကျော်၅ မိနစ်ရှိပေပြီ။

စိတ်သက်သာမှုအနည်ငယ်ရရှိသွားကြသည်။ လေယာဉ်အမှုထမ်းအစစ်များကိုလည်းလေယာဉ်ပေါ်ပါလာသည့် သူတို့၏ “ခရီးသည်”သည် မည်သူမည်ဝါဖြစ်ကြောင်းဖွင့်ပြောလိုက်လေသည်။ ဆရာဝန်တစ်ယောက်က ထိုးထားသောဆေးသည် အိုက်ခမန်းကိုအန္တရာယ်ပြု/မပြု စမ်းသပ်စစ်ဆေးလေသည်။အားလုံး အခြေအနေကောင်းပါသည်။ လေယာဉ်ပေါ် ပါလာသူအားလုံး အစ္စရေးနိုင်ငံသို့ပျံသန်းရမည့် (၂၂)နာရီခရီးစဉ်အတွက် အပန်းဖြေ နားနေကြလေသည်။

သို့သော် ရင်မောစရာအခန်း မပြီးဆုံးသေး။

လေယာဉ်တွင် စက်ပြင်အဖြစ်လိုက်ပါလာသူမှာ ပိုလန်တွင်မွေးဖွားသူ ဂျူးတစ်ဦး ဖြစ်သည်။ သူ(၁၁)နှက်သားအရွယ်က နာဇီစစ်သားတစ်ဦးသည် သူ၏လည်မျိုကိုဓားတေ့၍ လှေကားပေါ်မှကိုင်ပေါက်ချဖူးသည်။

သူတို့မြို့ကလေးတွင် ဂျူးများကိုဖမ်းဆီးပြီး ပစ်သတ်သောအခါ သူသည် အိမ်တစ်အိမ်တွင်ပုန်းအောင်းနေသဖြင့် လွတ်မြောက်ခဲ့သည်။ ထိုသို့ပုန်းနေသဖြင့် ကျန်ဂျူးများကိုထရီဘလင်းကားဆိုသော ချွေးတပ်စခန်းသို့ပို့ရာ၌လည်း မပါဘဲကျန်ခဲ့သည်။ နောက်ဆုံး သူနှင့်သူ့မိသားစုကိုဖမ်းမိသွားပြီး ချွေးတပ်စခန်းသို့အပို့ခံရလေသည်။ ထိုချွေးတပ်စခန်းတွင် လူအိုများနှင့်ကလေးများကို သတ်ဖြတ်ခဲ့ကြသည်။ သူ၏ ခြောက်နှစ်သားအရွယ်ညီလေးတစ်ဦးလည်းပါသွားလေသည်။ သူ့ညီလေးကိုသတ်ရန်ခေါ်သွားသည်ကို သူ့မျက်စိထဲမှဖျောက်ဖျက်မရနိုင်ခဲ့ပါ။သူကိုယ်တိုင်လည်း မကြာခဏဆိုသလို အသတ်ခံရမည့်စာရင်းထဲတွင် ပါဝင်တတ်ပါသည်။ သို့သော်အကြောင်းအမျိုးမျိုးကြောင့် သူလွတ်ခဲ့လေသည်။ တစ်ချိန်ကမူ ချွေးတပ်စခန်းမှူး နာဇီစစ်ဗိုလ်သည်အစားအစာခိုးယူသူ အကျဉ်းသားများ၏ မျက်စိကိုဖောက်ထုတ်လိုက်သည်ကိုသူမျက်မြင်တွေ့ရှိခဲ့လေသည်။

စစ်ကြီးပြီးသည်အထိ သူအသက်မသေဘဲကျန်ရစ်ခဲ့ခြင်းသည် ဘုရားမ,ခြင်းပင်ဖြစ်ပေသည်။လေယာဉ်ပေါ်ပါလာသူမှာ အိုက်ခမန်းဖြစ်ကြောင်း သိသွားသောအခါ သူ့စိတ်သူမထိန်းချုပ်နိုင်ရှာပေ။ မော့ဆက်အဖွဲ့ဝင်တို့က သူ့ကို အိုက်ခမန်းအနီးမှ ခပ်လှမ်းလှမ်းသို့ ပြောင်းရွှေ့ထိုင်ခိုင်းလိုက်တော့မှ သူအနည်းငယ်ငြိမ်သွားလေသည်။သူသည် ထိုင်နေရာမှ အိုက်ခမန်းကို စူးစူးဝါးဝါး ကြည့်ပြီးနောက် ကြိတ်၍ငိုကြွေးရှာလေသည်။ နောက်မကြာမီ သူသည်ထပြီး ခပ်ဝေးဝေးတွင်သွားထိုင်နေလေသည်။

ဗွေနိုးဇာရီမှထွက်လာပြီး ၂၄ နာရီကြာသောအခါ လေယာဉ်သည် အစ္စရေးနိုင်ငံ လစ်ဒါလေဆိပ်သို့ဆင်းလိုက်လေသည်။

အီဆာဟာရယ်သည် လေယာဉ်မှဆင်းဆင်းချင်း ဝန်ကြီးချုပ်ဘင်ဂူရီယန်ထံသို့ ကိုယ်တိုင်ကားမောင်းကာ သွားရောက်ခဲ့သည်။ အီဆာသည် သူတချိန်လုံး လေးလေးစားစားဆက်ဆံခဲ့သောဝန်ကြီးချုပ်အား ပြက်လုံးတစ်ခုပြက်လိုက်သည်။

" ကျွန်တော် ဝန်ကြီးချုပ်အတွက် လက်ဆောင်ပါလာတယ်"

ဘင်ဂူရီယန်သည် စက္ကန့်အတော်ကြာ စကားမပြောနိုင်ဘဲကြက်သေသေသွားလေသည်။

အီိဆာတစ်ယောက် အိုက်ခမန်းကိုခြေရာခံလိုက်နေခြင်းကို ဝန်ကြီးချုပ်သိပါသည်။ သို့သော်အိုက်ခမန်းကို အစ္စရေးနိုင်ငံအတွင်းသို့ခေါ်ဆောင်လာနိုင်သည်အထိ မြန်ဆန်လိမ့်မည်ဟု မထင်မိခဲ့ပေ။

အီဆာ အိမ်မှထွက်သွားသည်မှာ (၂၃)ရက်ကြာခဲ့ပါသည်။ထိုည အိမ်ပြန်ရောက်၍ ဇနီးသည်ရိဗကာက ဘယ်သွားနေသလဲဟုမေးသောအခါ အီဆာကခရီးထွက်နေတာပါကွာ ဟုသာ ခပ်ပေါ့ပေါ့ပြန်ဖြေခဲ့လေသည်။

ဝန်ကြီချုပ်ဘင်ဂူရီယန်သည် နောက်တစ်နေ့ပါလီမန်ထဲတွင် သမိုင်းဝင်သည့်မိန့်ခွန်းတိုလေး ပြောသောအခါမှ ရိဗကာသည် အဖြစ်မှန်ကိုသိရရာလေသည်။

" ကျုပ်တို့ ဒီနေ့ဒီနေရာက ကြေညာချင်တာကတော့ မကြာမီက အစ္စရေးထောက်လှမ်းရေးအဖွဲ့ဟာနာဇီရာဇဝတ်ကောင်ကြီးတစ်ဦးကို လက်ရဖမ်းဆီးနိုင်ခဲ့တယ်ဆိုတဲ့သတင်းပါပဲ သူကတော့အဒေါ့ဖ်အိုက်ခမန်း ဖြစ်ပြီး နာဇီခေါင်းဆောင်ကြီးတွေနဲ့အတူတကွ ဂျူးပြဿနာကို နောက်ဆုံး ဖြေရှင်းခြင်း(ဒါမှမဟုတ်) ဥရောပမှာရှိတဲ့ ဂျူးလူမျိုး (၆)သန်းကို သုတ်သင်သတ်ဖြတ်ခဲ့တဲ့ပြစ်မှုအတွက်တာဝန်ရှိခဲ့တဲ့ပုဂ္ဂိုလ်ပါပဲ။ အဒေါ့ဖ်အိုက်ခမန်းကို အခုအစ္စရေးနိုင်ငံတွင်းမှာအကျဉ်းချထားလိုက်ပါပြီ။ သူ့ကိုအစ္စရေးနိုင်ငံတွင်းမှာပဲ စစ်ဆေး တရားစီရင်မှာ ဖြစ်ပါတယ်"

ဝနကြီးချုပ်ဘင်ဂူရီယန်၏အသံသည် စိတ်ထိခိုက်မှုကြောင့်တုန်ရီနေသည်။

သူမိန်ခွန်းပြောနေစဉ် ပါလီမန်ထဲရှိလူတိုင်း၏ မျက်လုံးအစုံတို့သည် ပါလီမန်အမတ်မဟုတ်သူများထိုင်သည့် ခုံတန်းတစ်နေရာသို့ရောက်သွားကြသည်။ လူများသောနေရာတွင် ပေါ်ပေါ်ထင်ထင်မနေတတ်သူ အီဆာသည် ဤနေရာတွင်ထိုင်နေပါသည်။

အိုက်ခမန်းကိုဖမ်းဆီးရယူနိုင်ရန် မည်သူကြံစည်ဆောက်ရွက်ခဲ့ကြောင်း ရှင်းပြစရာ မလိုပါ။

သူ၏ အောင်မြင်မှုအထွတ်အထိပ်သို့ရောက်နေချိန်တွင် အီဆာသည် မလှုပ်မရှက်ဣနြေ္ဒရရထိုင်နေပေသည်။ သူ၏ မျက်လုံးပြာနှစ်လုံးက ရှေ့တည့်တည့်သို့ မမှိတ်မသုန်စိုက်ကြည့်နေပေသည်။

အီဆာ စကားတစ်ခွန်းမှလည်း မပြောခဲ့ပေ။

ထိုအချိန်မှစ၍ အစ္စရေးနိုင်ငံတွင်စကားဆုံ၍ အီဆာအကြောင်းပါလာလျှင်အီဆာလေးဟူသော ဝေါဟာရကိုမသုံးကြတော့ချေ။

အီဆာဟာရယ်