Eli Cohen အလီကိုဟင် (သို့မဟုတ်) သူလျှိုထိပ်သီး (အပိုင်း 6)

 ၁၉၆၅ ခုနှစ်ဇန်နဝါရီလ၏ ညတစ်ည

ညအမှောင်ထုကို အရုဏ်ဦးက တွန်းဖြိုလိုက်သောအခါ ပေါ်ပေါက်လာသည့်နံနက်ခင်း၌ မိုးပြေးကလေးရွာချနေပါသည်။

အလီကိုဟင်သည်သူ၏ အသံလွှင့်စက်အနီးတွင်ရှိသော အိပ်ရာပေါ်တွင်ပက်လက်လှန်နေသည်။

သူသည် သူမကြာမီက ပေးပို့ပြီးစီးသွားသော သတင်းရှည်တစ်ပုဒ်အတွက် တဲလာဗီမှတုံ့ပြန်မှုကို စောင့်ဆိုင်းနေပါသည်။

ညက သူနှင့်အတူညစာစားခဲ့သည့် သူ၏ ရင်းနှီးသော မိတ်ဆွေဆာလင်ဟာဟွမ်းထံမှ သမ္မတအယ်လ်ဟာဖက်ဇ်နှင့် ဆီးရီးယား ထောက်လှမ်းရေးဌာနအကြီးအကဲများ၏ စစ်ရေးအရ အရေးပါသည့်ဆုံးဖြတ်ချက်တစ်ရပ်ကို သူသိရှိခဲ့ပါသည်။ သူတို့သည်ပါလက်စတိုင်း ပြောက်ကျားအဖွဲ့ငယ်ကလေးများကို ပြန်လည်စုစည်းပေးပြီး တစ်ခုတည်းသော ညီညွတ်သည့်အကြမ်းဖက်သမား၏ အဖွဲ့ကြီးတစ်ခု အမြန်တည်ဆောက်ပေးရန်စီမံကိန်းရေးဆွဲနေပါသည်။ ထိုလူများကို ဆီးရီးယားစစ်စခန်းများတွင် လျှို့ဝှက်စွာသင်ကြားလေ့ကျင့်ပေးပြီး အစ္စရေးနယ်မြေအတွင်း ပြောက်ကျားစစ်ဆင်နွှဲစေမည်ဖြစ်သည်။

"ကျုပ်တို့တတွေ အယ်လ်ဂျီးရီးယားက လွတ်မြောက်ရေးတိုက်ပွဲကိုအတုယူပြီးဂျူးတွေကိုမောင်းထုတ်ရမှာပဲ။ ကျုပ်တို့ရဲ့ အယ်လ်ဂျီးရီးယား နောင်တော်တွေ မြောက်အာဖရိကမှာရှိတဲ့ ပြင်သစ်နယ်ချဲ့တွေကိုတိုက်ထုတ်သလိုပေါ့ဗျာ.."ဟု ဟာဟွမ်းက ကိုဟင်အား ပြောခဲ့သည်။

ယင်းဆုံးဖြတ်ချက်ပြုလုပ်ပြီး ၂၄ နာရီအတွင်းမှာပင် အထူးသတင်းမို့ သူလည်း အသေးစိပ်အချက်အလက်များကို အစ္စရေးဝန်ကြီးချုပ်ထံသို့ အရောက်ပေးပို့ပြီး ဖြစ်လေသည်။

ကိုဟင်သည်သူ၏ နာရီကိုတစ်ချက်လှမ်းကြည့်လိုက်သည်။ (၈)နာရီရှိပါပြီ။ သူသည် သူ၏အသံဖမ်းစက်ခလုတ်ကို အသာအယာကိုင်လိုက်ပြီး မော့ဆက်ဌာနချုပ်က ခါတိုင်း ပေးပို့နေကျဖြစ်သည့်လမ်းရှင်းပါသည်ဆိုသော သင်္ကေတကို သူရမည့်နေရာသို့ တိတိကျကျ ရောက်အောင်လှည့်လိုက်သည်။

ရုတ်တရက်သူ၏ အခန်းတံခါးမကို ခပ်ကြမ်းကြမ်း ထုရိုက်သံကြားလိုက်ရသည်။ကိုဟင်ဘာမျှ မလုပ်နိုင်မီ သစ်သားတံခါးရွက်သည် အစိတ်စိတ်ကွဲပြီး ပစ္စတိုကိုင်ထားကြသောလူ(၈)ယောက် အတင်းဝင်ရောက်လာကြသည်။ သူတို့ကား အရပ်ဝတ်အရပ်စားနှင့်ဖြစ်သည်။

ကမီးအာမင်တားဘက်စ်သည် သူ၏ လက်တစ်ဖက်နှင့် အသံလွှင်စက်ကိုခပ်မြန်မြန်လှမ်းအုပ်လိုက်သောအခါ ပစ္စတို(၂)လက်သည် သူ၏ဦးခေါင်းကိုတေ့ထားလိုက်လေသည်။

"မလှုပ်နဲ့နော်..."

ထိုလူများက သူ့အား အော်ပြောလိုက်သည်။

သူ၏ အိပ်ရာဘေးသို့အတင်းတိုးဝင်လာသူမှာ ယူနီဖောင်းဝတ်တစ်ဦးပင်ဖြစ်သည်။ ကိုဟင်သည်ထိုသူအား ချက်ချင်းမှတ်မိလိုက်ပါသည်။ သူသည် တန်ပြန်ထောက်လှမ်းရေးဌာ၏ အကြီးအကဲဖြစ်သူဗိုလ်မှူးကြီး အာမက်ဆိုဝေဒါနီဖြစ်သည်။

ဇာတ်လမ်းပြီးဆုံးခြင်းသို့ရောက်ခဲ့ပေပြီ။

 နောင်သောအခါ လက်ဘနွန်သတင်းစာများနှင့်အမေးအဖြေပြုလုပ်ရာ၌ ဗိုလ်မှူးကြီး ဆိုဝေဒါနီက သူကမီးအာမင်တာဘက်စ်ကိုမသင်္ကာခဲ့သည်မှာ ကြာမြင့်ပြီဖြစ်ကြောင်း ပြောကြားခဲ့သည်။

"ကျုပ်သူ့နောက်က လိုက်နေတာ ကြာပါပြီ။ သူ့အခန်းကိုလာတဲ့သူသူ့အခန်းက ထွက်လာတဲ့လူတွေကို သေသေချာချာ စောင့်ကြည့်နေခဲ့ပါတယ်။ သူ့အိမ်ခေါင်မိုးပေါ်မှာအသံလွှင်စက်ကောင်းကင်ကြိုးကို ကျုပ်ကိုယ်တိုင်တွေ့ခဲ့တယ်။ သူမှာရှိတဲ့အပေါင်းအသင်းမိတ်ဆွေနဲ့အဆက်အသွယ်တွေရဲ့ နာမည်စာရင်းကိုကြည့်လိုက်တာနဲ့ သူဟာ တော်တော်ကြောက်စရာကောင်းတဲ့သူလျှိုတစ်ယောက်ဖြစ်မယ်ဆိုတာ ကျုပ်သိခဲ့ပါတယ်။ သူ့ရဲ့ တယ်လီဖုန်းကိုလည်း ကျုပ်တို့ကြားဖြတ်နားထောင်းထားပြီး သူ့ရဲ့စာတွေပါ ဖွင့်ဖတ်ခဲ့ပါတယ်။.."

စင်စစ် ဗိုလ်မှူးကြီး ဆိုဝေဒါနီသည် အမှန်မပြောဘဲ ဖြီးခြင်းဖြစ်သည်။ လက်ဆုပ်လက်ကိုင်မိနေပြီမို့သူ့အတွက် ဖြီးရန်အကြောင်းခိုင်လုံနေပြီမဟုတ်ပါလော။ ဒမတ်စကတ်တွင် ကမီးအာမင်တားဘက်စ်သူလျှိုလုပ်ငန်း လုပ်ကိုင်နေသည့် (၃)နှစ်တာ ကာလပတ်လုံး သူဟန်ဆောင်ယူထားသော ဘဝကိုမည်သူကမျှ သံသယစိုးစဉ်း မရှိခဲ့ပါ။ သူ၏ မည်သည့်အပေါင်းအသင်း မိတ်ဆွေမျှ နောက်ယောင်ခံ၍အလိုက်မခံရပါ။ အဖမ်းအဆီးလည်း မခံရပါ။ မယုံသင်္ကာမှုဖြင့်စောင့်ကြည့်ခြင်းလည်း မခံရပါ။

ကိုဟင်ကိုဖမ်းမိခြင်းသည်ဗိုလ်မှူးကြီး ဆိုဝေဒါနီသတိဝီရိယနှင့်စောင့်ကြည့်၍လည်း မဟုတ်ပါ။ကိုဟင်၏ အကွက်မှားကြောင့်လည်း မဟုတ်ပါ။ သို့သော် အလီကိုဟင်ကိုဖမ်းမိခြင်းသည်အနီးတွင်ရှိသော အိန္ဒိယသံရုံးမှရေဒီယိုအသံဖမ်းသူများက လပေါင်းများစွာကပင် တင်ပြထားသောတိုင်တန်းချက်များနှင့် ဆက်သွယ်နေပါသည်။နယူးဒေလီသို့အသံလွှင့်ပေးပို့နေသော သူတို့၏ သတင်းများတွင် လေလှိုင်းအနှောင့်အယှက်များဝင်နေပါသည်ဟု သူတို့က ဆီးရီးယားအစိုးရအား တိုင်တန်းခဲ့ကြသည်။ ဆီးရီးယား အာဏာပိုင်များက ထိုအနှောင့်အယှက်ပေးနေသည့်ပင်ရင်းနေရာကို ဖော်ထုတ်ရန်ကြိုးစားခဲ့ကြသော်လည်း သူတို့တွင်ရှိသော စက်ကိရိယာများက သိပ်ခေတ်မမီသဖြင့်မတွေ့ရှိကြချေ။

မည်သို့မည်ပုံလျှို့ဝှက်ချက်ပေါ်ပေါက်ခဲ့သည်ဆိုသော အသေးစိပ်အချက်အလက်များကိုယနေ့တိုင်မည်သူမျှ မသိကြရပါ။ အနီးဆုံး ခန့်မှန်းသိရှိသည့်အချက်မှာ ဆီးရီးယားတွင် (၂)နှစ်ကျော်မျှအလုပ်လုပ်နေကြသော ဆိုဗီယက်အကြံပေးအရာရှိများအား ထိုလျှို့ဝှက်ချက်ကိုကူညီဖြေရှင်းပေးရန် အကူအညီတောင်းခဲ့သည့်အချက်ဖြစ်ပါသည်။ ထို့ကြောင့် တစုံတစ်ယောက်သည် အိန္ဒိယသံရုံးအနီးမှနေ၌ တရားမဝင်သော သတင်းများကိုအသံလွှင့်စက်နှင့်ပေးပို့နေကြောင်း သူတို့သိရှိလာလေသည်။

ရုရှားတို့ ဆီးရီးယား၌ အသုံးပြုနေပြီဖြစ်သော သို့မဟုတ် မော်စကိုမှတမင်ပေးပို့လိုက်သည်ဟုထင်ရသော ကမ္ဘာတွင်ခေတ်မီဆုံးဖြစ်သည့် ရွေ့လျားနိုင်သော ဤရှာဖွေရေးစက်များသည် ဆီးရီးယားတပ်မတော်ဌာနချုပ်တဝိုက် လမ်းမများပေါ်တွင် စတင်ရွေ့လျားကာ စုံစမ်းလေတော့သည်။ လိုက်လံရှာဖွေနေသူများသည် အလီကိုဟင်အသံလွှင့်ပေးပို့နေသော အသံကိုဖမ်းယူမိလေသည်။

သို့ရာတွင် ကိုဟင်သည် ထိုအသံဖမ်းသူများ ချက်ချင်း သူ၏ နေရာကိုသိရှိသွားနိုင်လောက်အောင်သတင်းကို ရှည်လျားစွာပေးပို့နေခြင်း မဟုတ်ပါ။ ထို့ကြောင့် ကိုဟင်ကိုမဖမ်းမီတစ်ညကသူ့အိမ်အနီးကအိမ်ကို သတင်းပို့နေသည့်နေရာထင်မှတ်ပြီး ဝိုင်းဝန်းထားကာအပေါ်ထပ်မှအောက်ထပ်အထိအခန်းစေ့ရှာဖွေခဲ့ကြပါသည်။

အလီကိုဟင် ဤကိစ္စကို ဘာမျှမသိရှာပေ။ သူသည် သတိပိုမိုထားလိုက်နိုင်ပါသည်။ နောက်ဘက်မှ သတိပေးသော အချက်ပြမီးများက ထင်ထင်ရှားရှား ပြသနေပါသည်။ သူ့ကိုမဖမ်းဆီးမီ (၂)ညအလိုတွင်သူသည် တဲလာဗီသို့သတင်းပို့ရင်း သူ၏ အခက်အခဲကိုပြောပြခဲ့ရှာသည်။ သူသည်သတင်းပို့ရာ၌ခါတိုင်းနှင့်မတူသော လျှပ်စစ်ဓာတ်ပိတ်ထားမှုနှင့်ကြုံတွေ့ရသဖြင့် အခက်အခဲများရှိသည်ဟုပြောပြလိုက်သည်။ လျှပ်စစ်ဓာတ်မလာသောအခါ သူသည် ဓာတ်ခဲများကိုသုံး၍သတင်းပို့လေတော့သည်။သူ့ကိုဖမ်းဆီးသည့်နံနက်ကလည်း သူတို့ရပ်ကွက်တွင် လျှပ်စစ်ဓာတ်မလာပါ။ ကိုဟင်သည် ဓာတ်ခဲများသုံး၍ သတင်းပို့ပြန်သည်။ လျှပ်စစ်ဓာတ်ကို ပေးလိုက်မပေးလိုက်လုပ်နေခြင်းကို သူမသိရှိတော့ချေ။

သူရှိနေသည့်နေရာကိုဖော်ထုတ်ခြင်းသည် လွယ်ကူလှပေသည်။ သူ၏အသံလွှင့်စက်တစ်လုံးတည်းသာလျှပ်စစ်ဓာတ်မလာချိန်၌ အလုပ်လုပ်နေခဲ့ပါသည်။

ကိုဟင်နေသည့်အဆောက်အအုံကို အသံလွှင့်နေသည့်ပင်ရင်းနေရာဟု သိရှိသည်နှင့်တပြိုင်နက်ရှရှားတို့သည် တန်ပြန်ထောက်လှမ်းရေးတပ်ဖွဲ့ဝင်များအား အိမ်ခေါင်မိုးကို စတင်ရှာဖွေခိုင်းလေသည်။အိမ်ခေါင်မိုးပေါ်တွင် သူတို့သည် ကောင်းကင်ကြိုးကိုခလုတ်တိုက်မိပြီး ကြိုးသည်အလီကိုဟင်၏အခန်းထဲသို့ဝင်သွားကြောင်း သိရှိလေတော့သည်။

ဗိုလ်မှူးကြီး ဆိုဝေဒါနီသည် ချက်ချင်းပင်သမ္မတကြီး အယ်လ်ဟာဖက်ဇ်ထံသို့သတင်းပို့လိုက်လေသည်။ သမ္မတကြီးက မယုံကြည်လောက်အောင်အံ့သြသွားရပြီး စိတ်လည်းအတော်ထိခိုက်သွားလေသည်။ သူအလွန်ယုံကြည်ခဲ့သော သူ၏ မိတ်ဆွေသည် သူ့အားသစ္စာဖောက်ခဲ့ပေပြီ။

ဆိုဝေဒါနီက သူလျှိုကိုလွှတ်ထားပြီး ရက်အနည်းငယ်ကြာ စောင့်ကြည့်လျှင်ကောင်းမည်ဟုအကြံပြုလိုက်သည်။ သူက ကိုဟင်ကို တည်ကြက်လိုထောင်၍ ပူးပေါင်းလုပ်ကိုင်နေသော အခြားအသံလွှင့်အော်ပရေတာများအပြင် သူ့ကိုကူညီနေကြသော သစ္စာဖောက်များ၏နာမည်များကို ဖော်ထုတ်လိုပါသည်။ ဗိုလ်မှူးကြီး ဆိုဝေဒါနီသည် ကိုယ်ပိုင်နိုင်ငံရေးရည်မှန်းချက်များရှိသူဖြစ်သဖြင့် ဤကိစ္စကိုအစွမ်းကုန်အမြတ်မထုတ်ရန်စိတ်အားသန်နေပါသည်။

အယ်လ်ဟာဖက်ဇ်ကလည်း ဆိုဝေဒါနီအား ဤကိစ္စ လုံးဝတာဝန်ယူစေပါက သူကြုံတွေ့ရမည့်နိုင်ငံရေးကျဆုံးခန်းများကို ချက်ချင်း သိမြင်လိုက်သည်။ သူသည် ကမီတားဘက်စ်ကို ချက်ချင်းဖမ်းဆီးရန်အမိန့်ပေးလိုက်သည်။ သို့သော်ဤသို့ဖမ်းဆီးခြင်းကို ပြည်သူလူထုအား လောလောဆယ်အသိမပေးရန်လည်း မှာကြားလိုက်သည်။

"ဒီကိစ္စဟာ နိုင်ငံတော်လုံခြုံရေးနဲ့လည်း မပတ်သက်စေနဲ့နော်" ဟု အယ်လ်ဟာဖက်ဇ်က သတိပေးထားခဲ့လေသည်။

ထို့ကြောင့်ပင်ဗိုလ်မှူးကြီး ဆိုဝေဒါနီသည် ကမီးအာမင်တားဘက်စ်၏ အခန်းထဲသို့အတင်းချိုးဖောက်ဝင်ရောက်လာစဉ်က သူလျို၏ မူလဇာစ်မြစ်အစစ်အမှန်ကိုလုံးဝမသိခဲ့ခြင်း ဖြစ်သည်။ သူလျိုကိုတဲလာဗီက ငွေးပေးခိုင်းစေကြောင်း ခန့်မှန်းကြည့်လျှင် လွယ်ကူစွာသိနိုင်သော်လည်း သူလျှိုသည်မည်သူမည်ဝါအတွက်ထောက်လှမ်းပြုလုပ်နေကြောင်း တိတိကျကျ သူဘာမျှမသိခဲ့ပါ။

ဆိုဝေဒါနီသည်အိပ်ရာပေါ်တွင်အဖမ်းခံထားရသော ကိုဟင်၏အပေါ်မှဆီး၍မတ်တပ်ရပ်ပြီး အော်လိုက်သောအခါ သူ၏အသံသည် အမျက်ဒေါသအပြင် ကျေနပ်နှစ်သိမ့်ခြင်းလည်းပါဝင်နေပေသည်။

သူသည်အသံကုန်ဟစ်အော်နေပါသည်။

"ငါတို့မင်းကိုဖမ်းမိပြီကွ ဝက်မသားရဲ့၊ မင်း ဘယ်သူလဲဟင် မင်းရဲ့နာမည်ရင်းဟာဘယ်သူလဲပြောစမ်း၊ မင်းက ဘယ်သူ့အတွက် ဒီမှာလာ သူလျှိုလုပ်နေတာလဲ"

အဖြေကတော့တည်ငြိမ်အေးဆေးလှပါသည်။

"ကျွန်တော်အာဂျင်တီးနားကလာတဲ့ အာရပ်လူမျိုး ကမီးအာမင်တားဘက်စ်ဖြစ်ပါတယ်။"

"အေး ကြည့်ရသေးတာပေါ့ကွာ"

ဆီးရီးယား ထောက်လှမ်းရေးခေါင်းဆောင်က ကြောက်မက်ဖွယ်အသံနှင့်ပြန်အော်လိုက်သည်။

"မင်း ခဏစောင့်အုံး သိလား၊ မင်းကိုသတ်ပစ်မယ်၊ အေး မင်းမသေခင် အလ္လာအရှင်မြတ်တန်ခိုးနဲ့မင်းကိုအကုန်ဖွင့်ပြောခိုင်းမယ်ကွ၊ မင်း ငါတို့ကိုတစ်ခုမကျန်ဖွင့်ပြောရမယ်။ မင်းရဲ့ ကြံရာပါတွေရဲ့နာမည်အားလုံးကို မင်းပြောပြရမယ်၊ မင်း လူဖြစ်ခဲ့တာ မှားခဲ့ပြီလို့နောင်တရစေရမယ်ဟေ့..သိလား"

ဗိုလ်မှူးကြီး ဆိုဝေဒါနီအော်ဟစ်ငေါက်ငမ်းနေချိန်၌ သူ့လူများသည် ကိုဟင်၏ အိမ်ခန်းထဲမှအခန်း(၅)ခန်းစလုံးကို ရှာဖွေလေတော့သည်။သူတို့သည်အောင်မြင်ဝင့်ကြွားသောအသံဖြင့်

ဒုတိယအသံလွှင့်စက်ကိုတွေ့ကြောင်း အော်ပြောလိုက်သည်။သူတို့သည် ယတ်ဒလေကိုယ်တိုက်ဆယ်ပြာတုံးများကို ခွဲလိုက်သောအခါ အတွင်းတွင်လွှစာမှုန့်များ ဖုံး၍ထည့်ထားသော ပေါက်ကွဲစေနိုင်သည့်ဗုံးအမျိုးမျိုး၊ စနက်တံအသေးစားများ၊အဆိပ်ဆေးပြားများကိုတွေ့ကြရသည်။ ဒိုင်းနမိုက်များနှင့် အခြားသူလျှိုလုပ်ငန်းအတွက်သုံးသည့်ပစ္စည်းများကိုလည်း တွေ့ရလေသည်။

လက်ရှိအခြေအနေတွင် ဆိုဝေဒါနီသည် ထိုပစ္စည်းများအတွက် ကမီးတားဘက်စ်ထံမှ တစ်ခုတည်းသောအဖြေကိုသာ ရရှိပါသည်။

"ဗုံးတွေကတော့ အဖျက်လုပ်ငန်းတွေအတွက်သုံးဖို့မဟုတ်ပါဘူး။ ကျွန်တော်အချိန်ရလုိ့ရှိရင်ဒီအသံလွှင့်စက်(၂)လုံးကို ဖောက်ခွဲပစ်လိုက်ဖို့ပါပဲ.."

နောက်ထပ်(၃)ရက်ကြာသောအခါ၌ ဆီးရီးယား ထောက်လှမ်းရေးအဖွဲ့ဝင်များသည် ကိုဟင်၏အခန်းကိုစက္ကူစာရွက်လို အစိပ်စိပ်အမွှာမွှာ ဆုတ်ဖြဲခဲ့ပြီဟုဆိုနိုင်ပေတော့သည်။ လူပေါင်း တစ်ဒါဇင်ခန့်သည်အဝတ်အစားများကို အပိုင်းပိုင်းညှပ်ပစ်ကြသည်။ အိမ်ထောင်ပရိဘောဂများကို ရိုက်ချိုးကြသည်။မျက်နှာကျက်နှင့်နံရံများကိုလည်း တွန်းဖြိုဆွဲချကြလေသည်။ သူတို့သည် ကမီးတားဘက်စ်ကအမှန်တကယ်ဝှက်ထားမည့် အခြားသော သူလျှိုများ၏ စာရင်းကိုလိုချင်ကြပေသည်။အဖမ်းခံရသော သူလျှို ကိုဟင်သည် ဤကာလအတောအတွင်း နှိပ်စက်ခြင်း မခံရပါ။ သို့သော်ဗိုလ်မှူးကြီး ဆိုဝေဒါနီကိုယ်တိုင်နှင့် သူ၏လက်ထောက် အက်ဒနန်တီဘားရားတို့သည် သူ့အားတစ်နာရီပြီး တစ်နာရီအနားမပေးတော့ဘဲ မေးခွန်းတွေထုတ်ကာ စစ်ဆေးမေးမြန်းလေတော့သည်။

"မင်းရဲ့ တခြားအသံလွှင့်စက်တွေဘယ်မှာ ထားသလဲ"ဟု သူတို့က သူ့အား မေးမြန်းခဲ့သည်။

ဇာတ်သိမ်းပိုင်းဆက်ရန်